Idman.biz
Avstriyanın Linz şəhərində keçirilən cüdo üzrə Qran-pri turnirinin sonuncu günündə Azərbaycanın ağırçəkili təmsilçiləri tatami üzərinə çıxıblar. +100 kq çəki dərəcəsində mübarizə aparan idmançılarımızdan biri mərhələ adlasa da, digəri yarışla vidalaşıb.
İdman.Biz xəbər verir ki, Camal Qamzatxanov turnirə inamlı start verib. İlk görüşündə britaniyalı Uesli Qriniçə qalib gələn cüdoçumuz 1/8 finalda Türkiyə təmsilçisi Munir Ertuğ ilə üz-üzə gəlib. Bu qarşılaşmada da rəqibindən üstün olan Qamzatxanov adını 1/4 finala yazdırıb. Onun növbəti rəqibi Yaponiya idmançısı Qay Hatakeyama olacaq.
Milli komandamızın digər üzvü Uşanqi Kokauri üçün isə yarış uğursuz yekunlaşıb. 1/16 finalda polşalı Yakub Sordili vaza-ari xalı ilə məğlub edən Kokauri 1/8 finalda yaponiyalı Qay Hatakeyama ilə qarşılaşıb. Gərgin keçən döyüşün sonunda rəqibinə uduzan Uşanqi turnirdə mübarizəni dayandırıb.
İndi bütün diqqətlər 1/4 finalda komanda yoldaşını məğlub edən yaponiyalı ilə qarşılaşacaq Camal Qamzatxanova yönəlib.
14:13
Avstriyanın Linz şəhərində keçirilən cüdo üzrə Qran-pri turnirinin sonuncu günündə Azərbaycanın daha bir ağırçəkili təmsilçisi mübarizəyə uğurlu start verib. Milli komandamızın üzvü Camal Qamzatxanov da ilk görüşündə inamlı qələbə qazanıb.
İdman.Biz xəbər verir ki, +100 kq çəki dərəcəsində yarışan Qamzatxanov 1/16 final mərhələsində Böyük Britaniya idmançısı Uesli Qriniç ilə qarşılaşıb. Rəqibindən daha üstün güləş nümayiş etdirən cüdoçumuz qalib gələrək adını 1/8 finala yazdırıb.
Bir qədər əvvəl eyni çəki dərəcəsində mübarizə aparan digər təmsilçimiz Uşanqi Kokauri də polşalı rəqibinə qalib gələrək 1/8 finala yüksəlmişdi.
Təmsilçilərimizin 1/8 finaldakı rəqibləri artıq məlumdur. Uşanqi Kokauri yaponiyalı Gai Hatakeyama, Camal Qamzatxanov isə Türkiyə təmsilsiçi Munir Ertuğla qarşılaşacaq.
Turnirin əvvəlki günlərində isə Vüsal Qələndərzadə "gümüş", Ömər Rəcəbli isə "bürünc" medal qazanıblar.
13:59
Avstriyanın Linz şəhərində keçirilən cüdo üzrə Qran-pri turnirinin sonuncu günündə Azərbaycanın ağırçəkili təmsilçiləri mübarizəyə qoşulublar. Milli komandamızın üzvü Uşanqi Kokauri turnirə qələbə ilə başlayaraq azarkeşləri sevindirib.
İdman.Biz xəbər verir ki, +100 kq çəki dərəcəsində yarışan Kokauri 1/16 final mərhələsində Polşa təmsilçisi Yakub Sordil ilə üz-üzə gəlib. Gərgin keçən qarşılaşmanın gedişində cüdoçumuz vaza-ari xalı qazanaraq üstünlüyü ələ keçirib. Görüşün sonuna qədər bu üstünlüyünü qoruyan Uşanqi rəqibini məğlub edərək 1/8 finala vəsiqə qazanıb.
11:51
Avstriyanın Linz şəhərində təşkil olunan cüdo üzrə Qran-pri turnirinə bu gün yekun vurulur. Yarışın son günündə Azərbaycan millisinin iki ağırçəkili təmsilçisi medallar uğrunda mübarizəyə daxil olur.
İdman.Biz xəbər verir ki, +100 kq çəki dərəcəsində qüvvəsini sınayan idmançılarımız 1/16 final mərhələsindən yarışa başlayacaqlar. Camal Qamzatxanov Böyük Britaniya təmsilçisi Uesli Qriniçlə qarşılaşacaq. Digər cüdoçumuz Uşanqi Kokauri isə polşalı Yakub Sordillə gücünü yoxlayacaq.
Təsnifat mərhələsinin döyüşləri Bakı vaxtı ilə saat 13:00-da başlayacaq. Medal qarşılaşmalarının keçiriləcəyi final bloku isə saat 20:00-da start götürəcək.
