Idman.biz
Rusiyanın futbol üzrə milli komandasının sabiq kapitanı Aleksey Smertin dünyanın ən ekstremal marafonlarından biri sayılan "Soyuq qütbü" yarışını uğurla başa vurub.
İdman.Biz xəbər verir ki, Oymyakon qəsəbəsində keçirilən qaçışda temperatur −40°C-dən aşağı olub.
Smertin bu ağır şəraitdə 50 kilometr məsafəni qət edərək öz yaş kateqoriyasında birinci yeri tutub.
İdman təbabəti üzrə mütəxəssis Şalva Tsurtsumiya Smertinin qaçışını şərh edərək qeyd edib ki, bu cür soyuqda qaçış orqanizm üçün son dərəcə ağır sınaqdır.
Onun sözlərinə görə, belə şəraitdə istilik saxlamaq üçün enerji sərfi kəskin artır, ağciyərlər həddən artıq yüklənir, soyuq hava bronxospazma səbəb ola bilər, ürək-damar sistemi isə periferik damarların daralması fonunda əlavə təzyiq altında qalır.
Smertin özü də etiraf edib ki, soyuq havada qaçış adi marafonlarla müqayisədə xeyli çox enerji tələb edir. Onun sözlərinə görə, adətən üç enerji geli kifayət edirdisə, bu dəfə beş gel istifadə etməli olub. Qaçış zamanı xəsarətsiz də ötüşməyib - futbolçu ayaq barmaqlarından birini don vurması ilə üzləşib.
Qeyd edək ki, Smertin 50 km məsafəni 4 saat 45 dəqiqəyə qət edib.
