Idman.biz
İniltərənin "Liverpul" komandasının aparıcı futbolçusu Məhəmməd Salahın səs-küylü müsahibəsindən sonra klub daxilində vəziyyət daha da gərginləşib və Arne Slotun komanda idarəçiliyi ciddi tənqid hədəfinə çevrilib. Şənbə günü komandanın heç-heçəsi oyunun gedişinə görə pozitiv məqamlar vəd etsə də, görüşün əsas mövzusu matçdan sonra baş verənlər olub.
İdman.Biz xəbər verir ki, oyunda hücum xəttində pozitiv məqamlar - Uqo Ekitikenin dublu, Milos Kerkeş və Florian Virtsin ümidverici çıxışı diqqət çəksə də, "Liverpul" artıq adət etdiyi problemi yenə yaşayıb: standart vəziyyətlərdə zəif müdafiə. Penalti və künc zərbəsindən buraxılan qol komandanı yenə xal itirməyə məcbur edib.
Azarkeşlər sosial şəbəkələrdə komandanın əsas probleminin hücum yox, müdafiə xəttindəki boşluqlar olduğunu yazırlar. "Liverpul" təəssübkeşləri həmçinin Slotla bağlı narazılığı təkcə Salah məsələsi ilə məhdudlaşdırmır. Bir neçə narahatlıq doğuran faktı da sadalayırlar:
- Harvey Elliottla ümumiyyətlə əlaqə saxlanılmaması;
- Federiko Kyezanın sağlam olmasına baxmayaraq az şans alması;
- Endi Robertsonun gözlənilmədən heyətdən çıxarılması;
- İndi isə Salahla münasibətlərin tam qopması və yanvar ayrılığı ehtimalı.
Azarkeşlər bildirirlər ki, bu sadalanan problemlərin hər biri ayrıca baxıldıqda idarəolunan görünə bilər, lakin hamısı birlikdə, üstəlik "Liverpul"un son aylardakı nəticəsizliyi və müdafiə böhranı fonunda Arne Slotun futbolçularla münasibəti ciddi suallar doğurur.
