"İmişli"nin baş məşqçisi: "Qapıçı mövqeyindən başqa..."

Birinci Liqa təmsilçisi "İmişli"nin baş məşqçisi Fərid Namazov Sport24.az saytına müsahibə verib. O, komandasının qış planı və transfer çalışmalarından danışıb.

- İkinci dövrə hazırlığına nə vaxtdan başlamısız?
- Dünəndən bir araya gəlmişik. Komandanı tərk edənlər var. Yaranan boşluğu yeni transferlərlə doldurmağı planlaşdırırıq.

- Artıq anlaşdığınız oyunçular var? 
- Danışıq apardıqlarımız var. Hələ münasibəti rəsmiləşdirməmişik deyə, onların adlarını çəkmək istəmirəm. Ancaq komandaya yeni qoşulanlar olacaq. Qapıçı mövqeyindən başqa bütün xəttlər üzrə yeni oyunçular axtarışındayıq.

- Fasilə dönəmində neçə yoxlama görüşü keçirməyi planlaşdırırsız? 
- Yoxlama oyunu keçirəcəyik. Sadəcə, İmişlinin coğrafi mövqey digər rayonlardan uzaqdı deyə, məcburiyyətindən İkinci Liqada çıxış edən "Kür-Araz"la oynayacğıq.

- "İmişli"nin qış fasiləsindən sonra Premyer Liqaya vəsiqə qazanmaq şanslarını necə dəyərləndirirsiniz?
- Premyer Liqaya vəsiqə qazanmağa iddialıyıq. Düzdür, hazırda liderlə xal fərqi 8-dir. Çalışacağıq aradakı fərqi azaldaq, çempionluq uğrunda mübarizə aparaq.

- Yəqin ki, öz komandanızla yanaşı, çempionatda əsas rəqiblərinizi də diqqətdə saxlayırsız...
- Açığı, rəqiblərimiz haqda çox məlumatım yoxdur. Daha çox öz komandamıza fokuslanmışıq. Sadəcə xəbərlər gəlir ki, onlar da transferlərdə aktivdirlər. Komandalar mövsümün ikinci yarısı üçün heyətlərini gücləndirməyə çalışırlar. Yeni sürprizlər ola bilər.