Sport24.az
RƏŞAD QASIMOV
Haradan, haraya? Bir vaxtlar Türkiyə və diqər yaxın qonşularımızın Çempionlar Liqasında çıxış edən komandalarının oyunlarına baxar, onların qələbəsinə sevinib, məğlubiyyətinə üzülərdik. Öz aramızda söhbət zamanı bizim klublarımızla onların təmsilçilərini müqayisə edərdik. İndi isə əksinədi... Türkiyə mediası "Qarabağ"ın uğurlarını qabardır, az büdcə ilə böyük uğur qazanmağın düsturunu ağdamlılardan öyrənməyi təklif edir. Ukrayna mətbuatı təmsilçisi olmadığı titanların yarışında Qurban Qurbanovun komandasının zəfərini manşetə yerləşdirir. Və Qurban hocaya "dəmir adam" deyə, müraciət edirlər.
Ötən gecə bütün Avropada adından söz etdirən "Qarabağ"ın "Benfika"nı necə məyus etdiyi barədə yazmaq istəmirəm. Oyunu bəlkə də bütün Azərbaycan ekran qarşısında izlədi. Baxa bilməyənlər isə ən azı qarşılaşmanın geniş icmalını seyr edib. Adım kimi əminəm ki, Vangelis Pavlidis 16-cı dəqiqədə hesab arasındakı fərqi 2 topa çatdıranda əksəriyyət ağdamlıların böyük hesabla məğlub olacağını düşünürdü. Ancaq nə Qurban Qurbanov, nə də komandası erkən qollardan "sındı". Əksinə, sanki buraxılan iki qol "süvarilər"i cəsarətli olmağa vadar etdi. Futbolçuların "ikinci nəfəsi" açıldı. Zubir ən yaxşı vaxtlarını xatırlatdı, "kolumbiya tankı" Medina rəqibin müdafiəçilərinə göz açmağa imkan vermədi, Bəhlul ayaq qoymalı yerə baş qoydu. Yeni transferlərdən Pedro Bikalyo UEFA-nın versiyasına görə, oyunun ən yaxşısı seçildisə, Kamilo Duran bir qol, bir məhsuldar ötürmə ilə qəbədə əsas pay sahiblərindən biri oldu.
"Qarabağ" Portuqaliyada qazandığı qələbə ilə həm də "demişdim, Çempionlar Liqasına hücumçu transfer etmədən getmək başını cəllad kötüyü üstünə qoymağa bənzəyir" söyləyənlərə, layiqli cavab verdi. Qurban Qurbanov komandasına, sərəncamında olan futbolçulara güvəndi, öz məşqçi bacarığına inandı, köməkçilərinə bel bağladı. İzafi sərfə yol verməmək üçün lazım bildiklərini heyətə cəlb etdi.
Futbol göründüyü kimi sadə oyun deyil. Aysberqin görünməyən hissəsi kimi, futbolun da görünməyən tərəfləri, çox incə nüansları var. Ki, bunu da Qurban hoca çox yaxşı başa düşür. Əvvəla, Azərbaycana çox səviyyəli legioner gətirmək çox çətindir. Ölkə çempionatının oyunlarının bəzi istisnalar olmaq şərti ilə boş tribunalar qarşısında keçirilməsi, Avropa futboluna hələ tam inteqrasiya olmaması və ən vacibi maliyyənin az olması tanınmış legionerlər üçün Azərbaycanı maraqsız edir. Lap tutaq ki, kimisə hansısa yolla, yüksək məvaciblə kluba dəvət etmək olar. Bu nəyi dəyişəcək? Uzağı komanda daxilində disbalans yaradacaq ki, Qurbanov da bunu yaxşı anlayır. Odur ki, baş məşqçi "Qarabağ" fərdlər üzərində qurulan yox, sistem komandası kimi görmək istəyir və bunu da bacarır.
Ola bilsin, növbəti matçlarda "Qarabağ" eyni qəhrəmanlığı təkrarlamayacaq, dünyanın ən mötəbər turnirində qələbə üzünə həsrət qalacaq. Olsun, Azərbaycan kimi qeyri-futbol ölkəsinin təmsilçisinin Çempionlar Liqasının əsas mərhələsinə qələbə ilə başlaması, bütün dünyanı "Qarabağ"dan danışmağa vadar etməsi özü belə bir tarixdir. Odur ki, cənablar, bu qələbədən ləzzət alıb, növbəti oyuna kimi uğurun dadını çıxarmaq lazımdır. Bizə həyəcanlı, sonunda sevinc gətirən 90 dəqiqəni yaşadanlara isə böyük təşəkkürlər.
