Idman.biz
İngiltərənin "Liverpul" klubunda baş verən gərginlik fonunda Misir milli komandası kapitan Məhəmməd Salahı açıq şəkildə dəstəkləyib.
İdman.Biz xəbər verir ki, futbolçunun "Liverpul"un baş məşqçisi Arne Slotla münasibətlərinin kəskinləşməsi fonunda Misir Futbol Assosiasiyası və baş məşqçi Hossam Hassan ulduz forvardın yanında olduqlarını sosial şəbəkə hesablarından nümayiş etdiriblər.
Misir Futbol Assosiasiyası rəsmi "X" hesabında Salahın fotosu ilə birlikdə "Heç zaman tək deyilsən. Sən həmişə ən yaxşısan" məzmunlu paylaşım edib.
Milli komandanın baş məşqçisi Hossam Hassan da "Instagram" səhifəsində Salahla birgə fotosunu paylaşaraq "Həmişə əzmkarlıq və güc simvolu" sözlərini qeyd edib.
2024-cü ilin fevralından milli komandaya rəhbərlik edən Hassanın Salah üzərində xüsusi qurduğu oyun sistemi fonunda 33 yaşlı hücumçu Afrika Millətlər Kuboku öncəsi Misirin əsas ümidlərindən biri sayılır.
