Sport24.az
"Monteneqro ilə oyunda qələbəni sona qədər qoruya bilməməyimizin səbəbi yorğunluqla əlaqədar idi". Bunu Sport24.az-a açıqlamasında qadınlardan ibarət Azərbaycan millisinin futbolçusu Sevinc Cəfərzadə deyib.
Yığmamızın kapitanı UEFA Millətlər Liqasının qrup mərhələsi çərçivəsində Monteneqro ilə oyun (1:1) haqqında fikirlərini bölüşüb:
"Litva ilə matçda müəyyən güc itirmişdik. Hər iki matç səfərdə idi. İki təyyarə dəyişib Monteneqroya gəlmişdik. Bərpa üçün cəmi iki günümüz var idi. Buna baxmayaraq, əzmkar oyun nümayiş etdirdik. Monteneqro ilə qarşılaşmada hesabda önə də keçsək də, şansızlıqdan qapımızda penaltı gördük. Penaltı epizodunda müəyyən şübhələr var. Hədəfimiz hər iki oyunda qalib gəlib qrup liderliyimizi təmin etmək idi. Bakıda Litva ilə matçda qazanacağımız bir xal belə bizi B Liqasına daşıyacaqdı. Ruhdan düşmürük, davam edirik. Sadəcə, Monteneqro ilə heç-heçə məni məyus etdi. Ani diqqətsizlikdən qapımızda qol gördük. Heç kimi günahkar görmürük. Səhv varsa, hamımızındır. Birlikdə qalib gəlib, birlikdə məğlub oluruq. Monteneqro yığması bir xala çox sevinirdi. Biz isə səfər oyunu olsa belə, bir xala çox sevinmədik. Məqsədimiz qələbə qazanmaq idi".
Qeyd edək ki, C liqasının 4-cü qrupunun son səfər görüşündə Monteneqro ilə qarşılaşan millimiz qələbəni son anda əldə verib. 54-cü dəqiqədə Manə Mollayeva hesabı açsa da, meydan sahibləri 90+2-ci dəqiqədə penaltidən bərabərlik qolunu vurublar. Millimiz son oyununu mayın 30-da evdə Litvaya qarşı keçirəcək.
