Juninyo "Papa" olmalıdı?

Qış fasiləsinin ən çox müzakirə edilən mövzusu Juninyonun keçididi. "Qarabağ"ın braziliyalı hücumçusunun "Sevilya"ya mümkün keçidi, bu transferin əhəmiyyəti barədə çox danışılıb. Ağdam təmsilçisinin "Sevilya" ilə ortaq məxrəcə gəlməsindən sonra məsələnin tezliklə rəsmiləşəcəyi proqnozlaşdırıldığı bir məqamda ortaya "Flamenqo" variantı çıxdı.

Bu məqamda bir lətifəni bölüşməyə ehtiyac var:

"Əgər hansısa qadın övladlarını həyat yoldaşından daha çox sevdiyini deyirsə, inanmayın! Uşaqları o, bir neçə saatlığa qonşu xanımın yanında qoyub öz işlərinin arxasınca gedə bilər. Ərini isə - heç vaxt!"

Bax, Juninyonun yuxusunda "Ramon Sançes Pisxuan"a çıxması məsələsi də eynidi. Braziliyalının pulu üstün tutması "Sevilya"nı arxa plana keçirməsinə səbəb olub. Və bu məqamda Juninyonu qınamağın da tərəfdarı deyiləm.

O, İspaniya təmsilçisinə 3 illik keçəcəkdi ki, bu da müqavilə müddətinin bitməsi zamanı 31 yaşının olacağı deməkdi. Karyerasının zirvəsində 3 il sonra yox, məhz bu gün olan Juninyo "Sevilya"dan 2 dəfə artıq pul təklif edən həmyerlilərinə "yox" deyə bilmir. Çünki "Flamenqo" karyerasının sonunadək qazana biləcəyi sual altında olan vəsaiti təklif edir.

Əlbəttə, "Qarabağ" üçün Avropanın elitar təmsilçisinin qapılarını açmaq perspektivdə daha sərfəlidi. Ancaq Juninyodan altruizm gözləmək doğru deyil. Futbolçu öz mənafeyini güdür və bu da təbiidi. Hər halda, "Roma Papasından daha böyük katolik olmaq mümkün deyil"…