Sport24.az
CEYHUN ƏLİYEV
Ötən gün baş tutan AFFA İcraiyyə Komitəsinin iclasında mühüm məsələlərə dair qərarlar verildi. Diqqətçəkən məqam yetərincə olsa da, fikrimcə, ən vacibi Premyer Liqada klub sayının artırılmasıdı. Necə deyərlər, al-qış-lar!
İndi isə sayın necə artacağına dair məsələyə toxunaq. Deyilənə görə, İcrakom üzvləri aşağıdan 3 komandanın gətirilməsi və elitanı 1 kollektivin tərk etməsi ilə yanaşı, 1-ci Liqadan seçiləcək 3 kollektivdən ən az xal toplayanla Premyer Liqanın sonuncusunun pley-off oynaması variantını da müzakirə edir. Bax, burada STOP!
Əsasnamədə 1-ci Liqanın qalibinin elitaya yüksələcəyi, Premyer Liqanının sonuncusunun isə onun yerinə yuvarlanacağına dair bənd var. O da var ki, elitada klub sayı artırılarsa, bu, 1-ci Liqa klubları sayəsində baş tutur. Məsələ kimin yüksələcəyi, kimin aşağı düşəcəyində deyil ha! Məsələ ondadı ki, belə pley-off matçını keçirməkdənsə, keçirməmək yaxşıdı. Niyə?
Siz Premyer Liqa klublarına ayrılan vəsaitlə 1-ci Liqanı necə müqayisə edə bilərsiniz? Siz mövsüm ərzinsə ölkənin ən güclü komandalarına qarşı 32 oyun keçirmiş klubu aşağı Liqada ən yaxşı halda 3-cü olmuş kollektivlə necə müqayisə edə bilərsiniz? Qısası, həmin matçın təşkili belə ayıbdı.
Ötən mövsüm "Qəbələ" 1-ci Liqaya düşəndə Fariz Nəcəfov kişi kimi dirəşdi ki, idman prinsipləri var və getməliyik aşağı dəstəyə. Elə AFFA rəhbərliyi də idman prinsiplərini rəhbər tutmaqla alqışalayiq qərar vermişdi…
İndi sual olunur: idman prinsipləri yalnız "Qəbələ" üçün keçərli idi? Yox, cənablar, pley-offu unutmalısınız! Çünki dövlətdən maliyyələşən çempionatlarda Premyer-Liqanın sonuncusu 1-ci Liqanın yığma komandasını belə rahatlıqla yenər.
