İdman.biz
"Çox sevincliyəm. Özümü çox xoşbəxt hiss edirəm".
Bunu "İdman Bizdə"nin qonağı olan Azərbaycan millisinin futbolçusu Ayşən Əhmədova deyib.
24 yaşlı müdafiəçi AVRO-2025-in seçmə mərhələsində Türkiyəni 1:0 hesabı ilə məğlub etdikləri oyunu şərh edib. O bildirib ki, məqsədləri 3 xal qazanmaq olub: "Türkiyə ilə oyundan əvvəl söhbətimiz olmuşdu. Qələbə qazanmağı çox istəyirdik. Matçdan əvvəl də məşqçilərimiz bizə tapşırıqlarını verdi və bunları düzgün yerinə yetirdik. Qrupdan çıxmaq şansımız var, ilkə imza ata bilərik. Bu qələbədə ailə kimi olmağımız böyük rol oynadı. Komandamızda birlik, bərabərliyin yüksək olmağı bizi bu yerə gətirib çıxardı".
Əhmədova qələbənin sirrini də açıqlayıb: "Türkiyə ilə 2 oyunda da qələbə qazanmaq istəyirdik. Planlar da buna görə idi. Türkiyədə penalti ilə itirdiyimiz xal bizə yaxşı təsir etmədi. Çünki hədəfimiz qrupdan çıxmaq idi. Ona görə də hər kəsdə aqressiya var idi. Oyunun 1-ci dəqiqəsindən sonuncu dəqiqəyə kimi qələbəyə köklənmişdik. Bizim üçün 1, yaxud 2 qolun fərqi yox idi. Məqsədimiz qol buraxmadan 3 xalı götürmək idi".
Qeyd edək ki, Türkiyə ilə matçda yeganə qolumuzun müəllifi 89-cu dəqiqədə Nigar Mirzəliyeva olub. Macarıstan ilə eyni, 4 xala malik yığmamız qrup sonuncu pillədə yer alıb.
Emin Ağa
İdman.biz
