Idman.biz
"Ferrari"nin pilotu Şarl Lekler menecerinə digər "Formula-1" komandaları ilə heç bir əlaqə qurmamağı tapşırıb.
İdman.Biz xəbər verir ki, monakolu pilot diqqətini istisnasız olaraq yalnız İtaliya komandası ilə birlikdə 2026-cı ilin yeni reqlament dövrünə keçid üzərində cəmləşdirib.
"Dünya çempionluğu titulunu başqa heç bir komanda ilə deyil, "Ferrari" ilə evə gətirmək əsas məqsəddir. Bilirik ki, hazırda onun yeganə fikri budur. Üfüqdə başqa heç nə yoxdur. O, diqqətini 2026-cı ildə qüvvəyə minəcək yeni qaydalara yönəldib", - İtaliyanın "Analisi Tecnica F1" nəşri yazıb.
Bu qərar "Ferrari"nin son illərdə ən pis nəticələrini göstərdiyi çətin 2025-ci il mövsümü fonunda qəbul edilib. Buna və son illərdə digər komandaların davamlı marağına baxmayaraq, pilot İtaliya komandasına sadiq qalır və mühəndislik komandasına yüksək səviyyədə etibar edir.
Daha əvvəl, 2025-ci ilin noyabr ayında komanda daxilində yeni güc aqreqatı da daxil olmaqla, 2026-cı il layihəsi ilə bağlı ehtiyatlı nikbinlik hökm sürürüdü. Qeyd edilib ki, "Ferrari"nin performansı və hibrid komponentləri rəqib
"Mercedes"in performansı ilə eyni səviyyədədir, baxmayaraq ki, etibarlılıq bütün istehsalçılar üçün açıq sual olaraq qalır. Ekspertlər eyni zamanda aerodinamika və şassiyə yüksək qiymətlər veriblər, lakin obyektiv qərar yalnız trek sınağından sonra verilə bilər.
