Report.az
Türkiyə ilə Azərbaycan təmiz idman, idman etikası və beynəlxalq miqyasda dopinqlə mübarizə sahəsində mübarizə aparan ölkələrdəndir.
"Report"un məlumatına görə, bunu Türkiyənin gənclər və idman nazirinin müavini Safa Koçoğlu Gürsoy Bakıda jurnalistlərə açıqlamasında deyib.
O, qardaş ölkədə yüksək qonaqpərvərliklə qarşılandıqlarını söyləyib.
Qurum təmsilçisi UNESCO-nun İdmanda Dopinqə Qarşı Beynəlxalq Konvensiyası çərçivəsində Dopinqin İdmanda Aradan Qaldırılması Fondunun Təsdiq Komitəsinin Üçüncü Rəsmi İclası ilə bağlı danışıb:
"Bu forumda həm beynəlxalq tərəfdaşlıq məsələləri müzakirə olundu, həm də ölkələrin dopinqlə mübarizə istiqamətində həyata keçirdiyi fəaliyyətlər ətrafında fikir mübadiləsi aparıldı. Biz idmançıların dürüst və ədalətli rəqabət mühitində yarışmasını arzulayırıq. Dopinqlə mübarizənin yalnız test nəticələri və ya müəyyən sanksiyalarla məhdudlaşmalı olmadığına, bu prosesin mütləq maarifləndirmə və elmi araşdırmalarla dəstəklənməsinin vacibliyinə inanırıq".
Safa Koçoğlu Gürsoy Bakıya səfərinin həm də UNESCO-dakı missiyası ilə bağlı olduğunu vurğulayıb:
"Bakıda həm də UNESCO çərçivəsindəki fəaliyyətimizlə əlaqədar iştirak edirik. Mən burada 1-ci qrup ölkələrinin təmsilçisi və məruzəçisiyəm. Beynəlxalq arenada belə bir komitənin fəaliyyət göstərməsi təmiz idman prinsiplərinin qorunması baxımından xüsusi əhəmiyyət kəsb edir".
