Report.az
"Turan Tovuz"un məşqçisi Yunis Hüseynov Azərbaycan Kubokunun yarımfinal mərhələsində komandasının haqqının yeyildiyini düşünür.
"Report" xəbər verir ki, bu barədə mütəxəssis "Zirə" ilə keçirilən yarımfinal mərhələsinin cavab oyunundan sonra mətbuat konfransında bildirib.
"Bugünkü oyunda qalib gəlmək istəyirdik. Özünüz gördünüz ki, oyunda güclü tərəf biz idik. İlk matçda haqqımızı yedilər. Haqlı olaraq finala vəsiqə qazanan komanda biz olmalı idik. İlk matçdakı hakim səhvləri bugünkü oyuna təsir etdi. Əziyyət çəkən futbolçuların haqqı yeyildi. "Zirə" komandasına uğurlar arzu edirəm", - deyə o söyləyib.
Qeyd edək ki, tərəflər arasında keçirilən ilk görüş "Zirə"nin 2:0 hesablı qələbəsi ilə bitib. Cavab oyununda isə hesab açılmayıb və Bakı klubu 2 qarşılaşmanın nəticəsinə əsasən finala adlayıb.
