Idman.biz
"Çox xoşbəxtəm, hər şey istədiyim kimi alındı".
İdman.biz xəbər verir ki, bu sözləri veteranlar arasında 11-ci dəfə Avropa çempionluğunu qazanan Fərhad Rəcəbli deyib.
Azərbaycanlı veteran idmançı Latviyanın paytaxtı Riqada keçirilən qitə çempionatındakı qələbəsi ilə bağlı təəssüratlarını bölüşüb: "Üç görüşüm oldu və hər rəqibin özünəməxsus gücü vardı. Yaxşı hazırlaşdığımı hiss edirdim, xüsusən də final döyüşü çox yadda qalan oldu. 12 yaşından fasiləsiz olaraq cüdo ilə məşğulam və məni motivasiya edən sadə bir səbəb var: bu, həyatımın bir hissəsi olub və bu mən özüməm. İndi isə qardaş və bacılarımın uşaqları hər yeni medalı səbirsizliklə gözləyirlər, bəzən elə düşünürəm ki, onlar bu mükafatlara bəlkə də məndən daha çox sevinirlər. Kiminsə "Facebook"da məni ‘cüdonun səfiri" adlandırdığı da olub. Bəlkə bu doğrudur, amma mən bunu şöhrət üçün etmirəm, bunu cüdoya və vətənimə olan sevgim üçün edirəm".
Fərhad Rəcəbli Avropa Cüdo İttifaqının saytına həmişə Vətənini fəxrlə təmsil etdiyini deyib: "Cüdo asan idman növü deyil, xüsusən də yaş artdıqca. Amma o mənə hər şeyi verib: universitetə qəbulda, hərbi xidmətdə və bütün həyatım boyu mənə istiqamət verib. O həmişə mənə düzgün yolu göstərib və buna görə çox minnətdaram".
İdman.biz
