Idman.biz
İyunun 13-də Macarıstanın Budapeşt şəhərində start götürəcək dünya çempionatı ərəfəsində Avropa Cüdo İttifaqı (EJU) 66 kq çəki dərəcəsində qüvvələr nisbətini dəyərləndirib və azərbaycanlı idmançı Ruslan Paşayevi də qeyd edib.
İdman.biz xəbər verir ki, EJU sözügedən çəki dərəcəsində yüksək rəqabətin olduğunu vurğulayıb.
Yazıda deyilir: "Bu, çox sayda idmançının mübarizə apardığı inanılmaz dərəcədə güclü çəki kateqoriyasıdır və burada bir neçə çox maraqlı cüdoçu var. Onların arasında İspaniyadan David Qarsiya Torneni qeyd etmək olar. O, zədə səbəbindən Avropa çempionatını buraxmalı olmuşdu. Bu çəkidə daha bir istedadlı idmançı azərbaycanlı Ruslan Paşayevdir. O, Parisdə keçirilən "Böyük Dəbilqə" turnirində qızıl medal qazanıb".
Eyni zamanda, reytinqin ilk "dördlüy"ündə Tacikistan (Nurali Emomali, Obid Cebov) və Yaponiyadan (Hifume Abe, Takesi Takeoka) olan idmançılar yer alıblar.
İdman.biz
