Idman.biz
Üçqat Olimpiya çempionu Teddi Riner (+100 kq) tatamiyə qayıtmasını təxirə salır.
İdman.biz xəbər verir ki, əfsanəvi cüdoçu iyunun 13-20-də Macarıstanın paytaxtı Budapeştdə keçiriləcək dünya çempionatında iştirak etməyəcəyini açıqlayıb.
Mundial üçün digər fransalı Olimpiya mükafatçıları ilə birlikdə avtomatik olaraq seçilən 11 qat dünya çempionu iştirak etməməsinin səbəbi kimi bu yaxınlarda aldığı zədədən qaynaqlanan sağlamlıq problemlərini göstərib: "Məruz qaldığım dirsək əməliyyatından bir neçə ay keçsə də, hələ də özümü 100% hazır hiss etmirəm. Tatamidə ən yüksək səviyyədə olmaq üçün həm fiziki, həm də mənəvi cəhətdən hazırlaşmalıyam".
Riner qızıl medal qazandığı Paris Olimpiadasından sonra yarışa çıxmayıb. O, son aylarda məşqləri bərpa edib və o cümlədən apreldə Yaponiyada təlim-məşq toplanışına qatılsa da, hazırlığının dünya səviyyəsində rəqabətədavamlı dönüşü təmin etmək üçün kifayət etmədiyini bildirib.
Riner həmçinin 2028-ci il Olimpiadası ilə bağlı planlarının dəyişməz qaldığını və Los-Ancelesdə yarışmaq niyyətində olduğunu təsdiqləyib.
İdman.biz
