Sport24.az
Azərbaycanlı idmançı Tofiq Musayevin UFC-də keçirəcəyi növbəti döyüşün vaxtı açıqlanıb. Sport24.az xəbər verir ki, bu barədə Offsideplus.az saytına məlumat verən 35 yaşlı idmançı bildirib ki, döyüş bu il oktyabrın 5-də ABŞ-ın Las-Veqas şəhərində baş tutacaq.
Yüngül çəkidə çıxış edən Musayevin rəqibi hələlik məlum deyil.
O, UFC-dəki ikinci döyüşünə daha ciddi hazırlaşacağını söyləyib: "Döyüşə hazırlıq məqsədilə 2-3 təlim-məşq toplanışı keçəcəyik. Fiziki məşqlərimiz Bakıda olacaq. Daha sonra Amerikaya getmək istəyirik. Hələlik plan belədir. Rəqib bəlli olduqdan sonra hazırlıq prosesi ilə bağlı detallar bir qədər də dəqiqləşəcək".
Qeyd edək ki, Tofiq Musayev UFC-də iyunun 21-də Bakıda debüt edib. Qırğızıstanlı Mıktıbek Oralbaya qarşı döyüşən həmvətənimiz birinci raundda gözlənilmədən ağrıdıcı fəndə düşərək təslim olub.
Onun UFC rəhbərliyi ilə 4 döyüşlük müqaviləsi var.
UFC yarışlarında Azərbaycanı Musayevdən başqa daha iki idmançı - Rafael Fiziyev və Nazim Sadıxov təmsil edir.
