Idman.biz
Məşhur döyüş ustalarından biri - əfsanəvi İp Manın tələbəsi, "Yaşayan Əfsanə" tituluna sahib Böyük Usta Samuel Kvokunun AZƏRTAC-a müsahibəsi
- Azərbaycana səfəriniz haqqında təəssüratlarınız maraqlıdır...
- Bu, Azərbaycana üçüncü səfərim oldu. Hər dəfə xoş qarşılanıram. Ölkənizdə təkcə təbii gözəlliyinin deyil, həm də adət-ənənələrin gücünün və insanların döyüş sənətinə dərin hörmətinin şahidi oldum. Azərbaycanın zəngin mədəni irsi var. Ölkənizin müasir inkişafı ilə ənənəvi dəyərlər arasında tarazlıq məni heyran etməkdə davam edir. Yenidən burada olmaq həqiqətən xoşdur.
- Azərbaycanda döyüş sənətinə olan marağı necə qiymətləndirirsiniz?
- Gənc nəsildə döyüş sənətinə güclü və artan marağın olduğunu görürəm. Seminarlarda tanış olduğum tələbələrin həvəsi, nizam-intizamı və bağlılığı diqqətəlayiqdir. Aydındır ki, burada döyüş sənətinə təkcə idman deyil, həm də həyat tərzi və şəxsi inkişaf kimi baxılır ki, bu da vinq çun ruhuna çox uyğundur. Azərbaycan mədəniyyəti hörmət, qonaqpərvərlik və güc kimi dəyərlərlə dərindən kök salıb. Bu dəyərlər döyüş sənətləri ilə gözəl şəkildə uyğunlaşır. Görüşdüyüm praktikantlar hörmətli, öyrənməyə həvəsli və yüksək intizamlı idilər. Onların açıq fikirliliyi və təvazökarlığı mənim üçün xoş təcrübə oldu. İnanıram ki, həmin insanların təkcə bacarıqlı döyüşçü deyil, həm də müdrik döyüş sənəti müəllimi olmaq potensialları var.
- Azərbaycanda şahidi olduğunuz qonaqpərvərlik sizdə hansı hissləri oyatdı?
- Qonaqpərvərliyiniz həqiqətən səmimidir. Sanki özümü qonaq kimi deyil, ailənin bir üzvü kimi hiss etdim. Bu cür isti münasibət müəllim və tələbələr arasında güclü bağ yaradır. Bu da məni xoşbəxt edir. Azərbaycan mədəniyyətində qonaqlara və ağsaqqallara göstərilən ehtiram ənənəvi döyüş dəyərləri ilə səsləşir.
- Gələcəkdə də Azərbaycanda seminar və ya müntəzəm təlimlər keçirməyi planlaşdırırsınız?
- Əlbəttə. Burada gördüyüm həvəs və fədakarlığı nəzərə alaraq, daha çox seminar, hətta müntəzəm təlim proqramları təşkil etməkdən çox məmnun olaram. Azərbaycan Vinq Çun Federasiyasına Azərbaycanda bu idman növünü təbliğ etdiyi üçün təşəkkür edirəm. Bu federasiyanın işi uzunmüddətli inkişaf üçün möhkəm zəmin yaradır.
- Vinq Çunu digər döyüş sənətlərindən fərqləndirən əsas xüsusiyyət hansıdır?
- Vinq Çun səmərəlilik, sadəlik və həssaslığa yönəlmiş yaxın məsafəli döyüş sistemidir. Bu idman növünü digər döyüş sənətlərindən fərqləndirən əsas xüsusiyyət hərəkət və enerjiyə elmi yanaşmadır. Bu, kobud gücə deyil, struktura, vaxta, həmçinin də enerjinin ağıllı istifadəsinə əsaslanır. Burada zəif bir şəxs texnikadan istifadə edərək, özünü güclü rəqibdən qoruya bilər. Bu da onun köklərini real həyatda özünümüdafiə üçün yaradılmış döyüş sənəti kimi əks etdirir.
Vinq Çun təliminin əsasını refleksləri, vaxtı, quruluşu və rəqibin enerjisini hiss etmək, eləcə də ona cavab vermək qabiliyyətini inkişaf etdirən unikal və dinamik həssaslıq məşqi Çi Sau (yapışqan əllər) təşkil edir. O, təkcə döyüş bacarığı deyil, həm də dərin fiziki intuisiya və axıcılıq yaradır. Bu, digər üslublarda nadir rast gəlinən atributlardır.
Bundan əlavə, vinq çun sadəcə fiziki intizam deyil, həm də mənəvi yoldur. İp Manın davranış kodu təvazökarlıq, hörmət, intizam və sosial məsuliyyətə vurğu edərək, məşq zalında və kənarda etik davranışları qorumağa yönəldir. Bu, fiziki ustalıq və daxili xarakter inkişafının birləşməsi, eləcə də vinq çunu tam bir döyüş sənəti və həyat tərzi olaraq həqiqətən fərqləndirir.
- Vinq çun fəlsəfəsi insan bədəninə necə təsir edir?
- Vinq çun idman növü ilə məşğul olarkən təkcə əzələlər deyil, həm də zehin, eləcə də daxili enerji məşq edir. İstirahət, düzgün quruluş və hərəkətə qənaət prinsipləri bədənə daha təbii, həmçinin səmərəli hərəkət etməyi öyrədir. Vaxt keçdikcə duruş, nəfəs alma, koordinasiya və bədən şüurunu yaxşılaşdırır. Gündəlik vinq çun məşqi hərəkətli bir meditasiya kimidir. O, daxili sakitliyi inkişaf etdirir və fiziki həssaslığı kəskinləşdirir.
- Müəllim-şagird münasibətində döyüş sənətinin yeri nə dərəcədə vacibdir?
- Müəllim-şagird münasibəti ənənəvi döyüş sənətinin ürəyidir. Bu, fiziki təlimatdan kənara çıxır və dəyərləri, nizam-intizamı, eləcə də düşüncə tərzini ötürməkdən ibarətdir. Müəllim və tələbə arasındakı bağ etibar, təvazökarlıq və qarşılıqlı hörmət üzərində qurulur. Bu, tələbənin yalnız bacarıqlarını deyil, xarakterini də formalaşdıran və ömürboyu davam edən bir münasibətdir.
İdman.biz
