Idman.biz
Azərbaycan basketbolu bu gün tarixində ilk dəfə olaraq Beynəlxalq Basketbol Federasiyasının (FIBA) bayrağı altında keçirilən əsas Avropa kubokunda - Çempionlar Liqasında təmsil olunacaq.
İdman.biz-in məlumatına görə, "Sabah" əsas mərhələdə çıxış edəcək ilk Azərbaycan klubu olacaq. Komandamız Bakı vaxtı ilə saat 20:00-da Çexiyanın "Nimburk" klubu ilə üz-üzə gələcək. Görüş Praqadakı "Kralovka" arenasında baş tutacaq.
"Sabah" "B" qrupunda güclü rəqiblərlə qarşılaşacaq. Komandamızın rəqibləri Almaniyanın "Alba Berlin" klubu, Çexiyanın "Nimburk"u və Samokovdakı təsnifat mərhələsinin qalibi - Fransanın "Şalon" komandası olacaq.
"Sabah"ın gücü və liderləri
Rimas Kurtinaytisin rəhbərlik etdiyi Azərbaycanın "Sabah" klubunun heyəti Avropa səviyyəsinə uyğun formalaşdırılıb. ABŞ-li oyun qurucusu Devid Nikols, forvard Kit Corcan, nəhəng Castin Tillman və fransız mərkəz oyunçusu Jan-Mark Pansa komandanın əsas hücum yükünü daşıyır.
Heyətdə Devid Nikols oyunun tempinə nəzarət edir və matçın məhsuldar sonluqla bitməsində əsas rol oynayır. C. Tillman üçsaniyəlik zonadakı oyunu ilə seçilir, Jan-Mark Pansa boy üstünlüyü və blokları ilə müdafiəni gücləndirir. Corcan isə topsuz hərəkətdə və uzaq məsafədən zərbələrdə önəmli fiqurdur. Komandada yerli oyunçuların da rolu böyükdür ki, bu da intensiv səfər oyunlarında əlavə üstünlük yaradır.
Rəqibin portreti – təcrübə və fiziki güc
"Nimburk" Çempionlar Liqasının daimi iştirakçılarındandır. Çexiya klubu artıq doqquzuncu mövsümdür turnirdə çıxış edir. Komandanın perimetrlərində Voytex Xruban və Yaromir Boqaçik kimi sabit atıcılar var. Ondrjej Sexnal oyunun tempinə nəzarət edir. Yay transferləri sayəsində hücum xətti skorçu Cəbari Raysla, boy altı isə Markus Santos Silva və Martin Krij tandemi ilə güclənib.
Rotasiyada Cəmiyir Birkus və Vesli Drimer kimi adlar da var. Bu, "Nimburk"a həm hücumda, həm müdafiədə üstünlük və çeviklik verir. Komandanın təcrübəsi, uzaq atışları və fiziki gücü onu evdə bu qarşılaşmanın favoriti edir.
"Sabah"ın şansı
Azərbaycan təmsilçisinin əsas üstünlüyü liderlərin fərdi ustalığı və ön xəttdə atletik oyunudur. Əgər Nikols rəqibin təzyiqinə tab gətirsə, Tillman–Pansa tandemi mübarizədə üstün olsa, "Sabah"ın ikinci şans xalları və açıq atış imkanları yarada bilər.
Komandanın zəif nöqtəsi isə debüt təcrübəsinin olmamasıdır. Bu isə o deməkdir ki, "Sabah" top itkisinə yol verməməlidir. "Nimburk" intizamlı oyun və uzaq atışlarla seçilir, lakin təkli mübarizəni uduzanda və oyunçularının tez-tez qayda pozduğu hallarda ritmləri pozula bilir.
Nəticə – meydanda tarix yazıla bilər
Ekspertlərə görə, "Sabah"ın Praqada qələbə şansı 30–35 faiz civarındadır. Uğurlu nəticə üçün komanda top itkilərini minimuma endirməli və boş atışlardan maksimum yararlanmalıdır. Hər şey gərgin son dəqiqələrə qalsa, 2–3 hücum və liderlərin soyuqqanlılığı matçın taleyini müəyyənləşdirəcək.
Bu debütün əhəmiyyəti bir oyundan daha böyükdür. "Sabah" qrup mərhələsində ilk üçlüyə düşə bilsə, bu, Azərbaycan basketbolunun Avropa arenasında tanıdılması, gənclərə motivasiya, sponsorların və infrastrukturun inkişafı baxımından mühüm mərhələ olacaq. Qrupdakı hər xal uzunmüddətli layihənin güclənməsinə və ölkə çempionatının səviyyəsinin artmasına xidmət edəcək.
Teymur Tuşiyev
