Idman.biz
"Los Anceles Leykers"in keçmiş müdafiəçisi və Milli Basketbol Assosiasiyasının (NBA) üçqat çempionu Brayan Şou əfsanəvi Kobi Brayant barədə maraqlı xatirə danışıb. Bu barədə İdman.biz xarici mətbuata istinadən məlumat verir.
"Bir səhər onu balıq ovuna dəvət etdim, lakin o gəlmədi. Daha sonra ona tutduğum köpək balığının fotolarını göndərdim", - Şou bildirib.
Şou Brayanta balıqla şəkil çəkdirdikdən sonra onu suya buraxdığını deyib. Brayantın sonrakı davranışı isə Şounu təəccübləndirib.
"Onu niyə suya buraxdığımı soruşdu. Mənsə bu vəziyyətdə başqa neyləyə biləcəyimlə maraqlandım. O dedi: "Onu öldürməli idin". Niyəsini soruşdum. Cavab verdi ki, ələ keçib, ona görə ölməlidir. Onun həyat fələsfəsi belə idi", - Şou yekunlaşdırıb.
41 yaşlı Kobi Brayant 2020-ci il yanvarın 26-da Kaliforniyanın Kalabasas şəhərində özəl Sikorsky S-76 helikopterinin qəzaya uğraması nəticəsində ölüb. Qəzada onun 13 yaşlı qızı Cianna və ailə dostları da daxil olmaqla daha 8 nəfər həlak olub.
İdman.biz
