Idman.biz
Daha bir Azərbaycan klubuna yeni sponsor gəlib.
İdman.biz-in prosport.az-a istinadən verdiyi xəbərə görə, söhbət bu mövsüm güclülərin yarışdığı A qrupunda mübarizə aparacaq "Gəncə" basketbol klubundan gedir.
Azərbaycan Təhsil İşçiləri Azad Həmkarlar İttifaqı Respublika Komitəsi (ATİAHİ) bundan sonra bu kluba sponsorluq edəcək. Klubun rəhbəri ATİAHİ-nin ötən ilin avqustun 22-də sədri seçilmiş Araz Paşayev olacaq.
Araz Paşayev 4 iyul 1983-cü ildə Şəkidə anadan olub. O daha əvvəl – 2021-ci ildən Elm və Təhsil Nazirliyinin tabeliyində Təhsil Tələbə Krediti Fondunun İdarə Heyətinin sədri vəzifəsində çalışıb. Hazırda Azərbaycan Əmək və Sosial Münasibətlər Akademiyasında "Əmək və sosial təminat hüququ" fənnini tədris edir.
Hələ ki rəhbərlik rəsmi formada elan edilmədiyindən, klub yeni transferləri də açıqlamayıb. Ancaq yeni rəhbərliyi olan komandanın Gəncədəki MDB Oyunlarına görə Qubada təlim-məşq toplanışı keçib, çempionata hazırlaşdığı bizdə olan məlumatlar arasındadır.
Qeyd edək ki, Azərbaycan Basketbol Federasiyasının prezidenti elm və təhsil naziri Emin Əmrullayevdir. Daha əvvəl bu xətlə "Landau" məktəbi "Abşeron Lions" komandasına sponsor kimi cəlb edilmişdi.
