Idman.biz
Filippinin "Mindoro" komandasının basketbolçusu Yonas Tibayan yerli MPBL liqasının matçı zamanı "Gensan Uorriors"dan Mikole Sorelanın endirdiyi güclü zərbədən sonra çoxsaylı xəsarətlər alıb.
İdman.biz xəbər verir ki, "INQUIRER Sports"un məlumatına görə, idmançıda beyin silkələnməsi, çənəsinin qırılması, dodağının partlaması və çiyninin sınması qeydə alınıb.
Nəticədə Sorela 200 min Filippin pesosu (təxminən 3,5 min ABŞ dolları) məbləğində cərimələnib və MPBL-dən ömürlük uzaqlaşdırılıb.
O, "Gensan Uorriors"un hücumu zamanı Tibayana qəfil və sərt zərbə endirib. Bundan sonra rəqib oyunçu yerə yıxılaraq başını tutub və uzun müddət özünə gələ bilməyib. O, meydançanı xərəkdə tərk edib.
"Mindoro" klubunun sahibi Cennifer M. Kruz sosial şəbəkədə hadisə ilə bağlı belə yazıb: "Mikole Sorelanın zərbəsinə məruz qalan Yonas Tibayana tətbiq olunan tibbi prosedur uğurla başa çatıb. Dünən uzunmüddətli cərrahiyyə əməliyyatından sonra çənə, yanaq və dişlərdəki zədələr aradan qaldırılıb.
Həkimlərin sözlərinə görə, ağzında çoxsaylı yırtılmış yaralar olub, ön dişləri isə qopub. Hazırda onun vəziyyəti sabitdir və xəstəxanada müalicəsini davam etdirir".
İdman.biz
