Idman.biz
İspaniyanın "Real"(Madrid) və "Barselona" basketbol klubları Avroliqadan ayrılaraq FIBA Çempionlar Liqasına qoşulmaq imkanını ciddi şəkildə nəzərdən keçirirlər. Həmin turnirdə hazırda "Səbail", gələcəkdə isə Azərbaycan Basketbol Liqasının növbəti qalibi çıxış edəcək.
Bu barədə İdman.Biz Gazzetta.gr nəşrinə istinadən məlumat yayıb.
Mənbənin məlumatına görə, hər iki klub "NBA Europe" layihəsi işə düşənədək müvəqqəti olaraq FIBA Çempionlar Liqasına keçə bilər. "Barselona" və "Real" bu layihə ilə fəal təmasdadırlar. Belə ki, hər iki kluba təminatlı müqavilələr və maliyyə bonusları təklif olunur.
Eyni zamanda Avroliqa səhmdarları klublardan ilin sonunadək yeni onillik müqavilənin imzalanması barədə qərar vermələrini tələb edirlər. Bu müqavilə 2026-cı ilin iyununda müəyyən edilmiş ilkin müddəti əvəz edəcək.
Qeyd olunur ki, "Real" və "Barselona" son zamanlar Avroliqa Şurasının iclaslarında müşahidəçi mövqeyi tuturlar. FIBA isə bu keçidə müsbət yanaşır, çünki bu klubların iştirakı turnirin nüfuzunu və kommersiya baxımından cəlbediciliyini artıracaq.
Əgər İspaniya nəhəngləri FIBA Çempionlar Liqasına keçərlərsə, artıq 2026/2027 mövsümündən etibarən Azərbaycan klubunun potensial rəqibinə çevrilə bilərlər. Bu da o deməkdir ki, gələcəkdə Bakıda "Barselona" və ya "Real" ilə oyunlar keçirilə bilər.
Bundan əvvəl bildirilmişdi ki, NBA 2027/2028 mövsümündə Avropa layihəsini işə salmağı nəzərdən keçirir. Lakin layihənin dəqiq başlanma tarixi hələ müəyyən olunmayıb. Buna görə də, FIBA Çempionlar Liqasına keçid İspaniya klubları üçün "NBA Europe" layihəsində potensial iştirakdan əvvəl müvəqqəti mərhələ ola bilər.
Teymur Tuşiyev
