Idman.biz
Azərbaycan Basketbol Liqasında bu gün III turun oyunları davam edir
İdman.Biz xəbər verir ki, günün ilk qarşılaşmasında "Sabah" komandası "Şəki" ilə üz-üzə gələcək. Görüş saat 14:30-da start götürəcək.
Turnir cədvəlində dörd xalla A qrupunun lideri olan "Sabah", bu turda ardıcıl qələbəsini rəsmiləşdirməyə çalışacaq. İki xalla beşinci yerdə qərarlaşan "Şəki" isə sürpriz nəticə əldə etməyi hədəfləyir.
Günün ikinci oyunu saat 16:30-da başlayacaq. Bu dəfə "Sumqayıt" və "Quba" komandaları üz-üzə gələcəklər. B qrupunda üç xalla dördüncü sırada olan "Quba" mövqeyini gücləndirmək, iki xalla son pillədə yer alan "Sumqayıt" isə ilk qələbəsini qazanmaq istəyir.
Hər iki qarşılaşma Bakı İdman Sarayında keçiriləcək.
Qeyd edək ki, turun əvvəlki oyunlarında "Naxçıvan" "Lənkəran"ı 91:82, "Ordu" isə "Sərhədçi"ni 85:73 hesabı ilə məğlub edib.
