İdman.biz
"İlk iki mərhələ çox çətin oldu. Rəqib komandalar yüksək səviyyəli oyun göstərdilər".
İdman.biz xəbər verir ki, bunu kişilərdən ibarət voleybol yığmasının hücumçusu Andrey Melnikov deyib.
Təcrübəli voleybolçu Azərbaycan millisinin Qızıl Avropa Liqasındakı uğursuz çıxışına toxunub: "Rəqib komandaların voleybolçuları uzun müddətdir birlikdə çıxış edirlər və bir-birinin oyununu yaxşı bilirlər. Həmçinin bu yığmadalar artıq neçə illərdir ki, beynəlxalq turnirlərdə çıxış edirlər. Qarşıdakı oyunlara gəlincə, hansısa məqsədlərdən danışmaq çətindir. Lakin biz maksimum səviyyədə çalışacağıq ki, yaxşı oyun nümayiş etdirək. Əlbəttə ki, qələbə qazanmaq istərdik, lakin obyektiv olmaq lazımdı. Bizə çox çətin olacaq. Çünki Estoniya komandasının üzvləri uzun müddətdir bir yerdə oynayırlar. Bununla belə, biz də maksimum dərəcədə çalışıb, qələbə üçün sonadək əlimizdən gələni edəcəyik".
Qeyd edək ki, Azərbaycan yığmasının liqanın ilk 2 mərhələsində keçirdiyi 4 oyunu da set qazanmadan uduzub.
İdman.biz
