Idman.biz
Bu mövsüm qadın voleybolçular arasında Yüksək Liqada debüt edən komandalardan biri də "DH Volley Baku" kollektividir. Yeni yaradılan klub həyata keçirdiyi transferlərlə çempionluğa iddialı olduğunu göstərdi. Bəs, klubun təməli necə qoyulub?
Bu və digər suallar ətrafında Bakı təmsilçisinin prezidenti Şərəf Yalçınla söhbətləşdik. Türkiyəli funksionerin AZƏRTAC-a verdiyi müsahibəni təqdim edirik:
- "DH Volley Baku" ideyası necə yarandı?
- "DH Volley Baku" ideyası Azərbaycanda qadın voleyboluna yeni nəfəs gətirmək, həm də bu idman növündə davamlı inkişaf və peşəkar idarəetmə modelini qurmaq məqsədilə yaranıb. Əsas motivimiz yerli oyunçular üçün sabit platforma yaratmaq və Azərbaycan voleybolunu yenidən beynəlxalq arenada tanıtmaqdır. Bunun üçün də əlimizdən gələn hər şeyi edirik. Hazırda komandamızın heyətində yığmada çıxış edən 5 voleybolçu var. Onlardan 3-ü yenidən milliyə dəvət olundu.
- Sizcə, komandanız Azərbaycan qadın voleybolundakı hansı boşluğu doldura bilər?
- Hazırda ən böyük boşluq uzunmüddətli inkişaf strategiyasının və yerli istedadlara etimadın azlığıdır. "DH Volley Baku" bu boşluğu həm gənc oyunçuların yetişdirilməsi, həm də müasir idarəçilik modeli ilə doldurmağı qarşısına məqsəd qoyur. Gənc oyunçuların inkişafı bizim prioritet istiqamətlərimizdəndir. Onların fiziki, taktiki və psixoloji hazırlığına investisiya qoymaqla həm klubun, həm də ölkə voleybolunun gələcəyini təmin etməyə çalışırıq. Əlimizdə istedadlı oyunçular var və onları Azərbaycan voleyboluna qazandırmaq istəyirik.
- Komandanın formalaşma prosesi necə oldu? Əsas seçim meyarlarınız nələr idi?
- Komanda həm təcrübəli, həm də perspektivli oyunçuların balansı əsasında quruldu. Əsas meyarlarımız peşəkarlıq, komanda ruhu, intizam və motivasiya idi. Biz yalnız bacarığı deyil, həm də mental gücü yüksək olan idmançıları bir araya gətirdik.
- Azərbaycan voleybolunda gənc istedadların sayını necə qiymətləndirirsiniz?
- Gənc istedadlarımız az deyil, sadəcə, onlara düzgün şərait və uzunmüddətli etimad lazımdır. Əgər bu potensialdan sistemli şəkildə istifadə etsək, Azərbaycan voleybolu yenidən qızıl dövrünə qayıda bilər. Bizim də istəyimiz məhz budur.
- "DH Volley Baku"nun cari mövsüm üçün əsas hədəfi nədir?
- Əsas hədəfimiz keyfiyyətli oyunla çempionatda qızıl medal və avrokuboklara vəsiqə qazanmaqdır. Azərbaycan voleyboluna səs salmaq və yolumuza uğurla davam etmək istəyirik. Paralel olaraq, komanda daxilində gənc oyunçuların təcrübə qazanmasını da vacib məqsəd hesab edirik. İnanırıq ki, çempion olacağıq.
- Sizcə, Azərbaycanda qadın voleybolunun daha populyar olması üçün nələr çatmır?
- Marketinq və mediayönümlü fəaliyyət çatışmır. Klublar və federasiya birlikdə çalışaraq, voleybolu məktəblərə, universitetlərə və sosial mediaya daha da yaxınlaşdırmalıdır. Azarkeşlə emosional bağ yaratmaq lazımdır.
- Azərbaycan çempionatında təşkilatçılıq səviyyəsini necə qiymətləndirirsiniz?
- Son illərdə müəyyən irəliləyişlər olsa da, hələ də peşəkar idarəetmə, sponsor cəlbi və infrastruktur baxımından inkişaf potensialı böyükdür. Biz "DH Volley Baku" olaraq bu sahədə nümunə olmağa çalışırıq.
- "DH Volley Baku" gələcəkdə uşaq və gənclər akademiyası açmağı planlaşdırırmı?
- Bəli, bu artıq növbəti planlarımızdır. Akademiya layihəsi üzərində ilkin işlərə başlanılıb. Məqsədimiz 10–18 yaş arası qız uşaqlarını sistemli şəkildə yetişdirmək və onları gələcəkdə əsas komandaya inteqrasiya etməkdir.
- Avropa səviyyəsində rəqabət üçün Azərbaycan klubları nələri dəyişməlidir?
- Avropa səviyyəsində rəqabət aparmaq üçün klublar davamlı inkişaf konsepsiyasını mənimsəməlidirlər. Təkcə güclü oyunçularla deyil, bilik və sistem üzərində qurulmuş bir model yaradılmalıdır. Bunun üçün elmi yanaşma, müasir məşq metodikası, düzgün bərpa prosesi və oyun analiz sistemi qurmaq vacibdir. Həmçinin yerli oyunçulara inam və öz məktəbini formalaşdırmaq uzunmüddətli uğurun əsas açarıdır. Gənclərə yatırım, yerli məşqçilərin inkişafı və uzunmüddətli maliyyə sabitliyi Avropa səviyyəsində rəqabət üçün əsas şərtlərdir.
- Klub prezidenti kimi özünüzə hansı prinsipi əsas götürürsünüz?
- Əsas prinsipim sistemli fəaliyyət, peşəkarlıq və intizamın qorunmasıdır. Hesab edirəm ki, uğurun əsasını düzgün strukturun qurulması və hər bir prosesin planlı şəkildə idarə olunması təşkil edir. "DH Volley Baku"da bütün qərarlar strateji yanaşma, məsuliyyət və şəffaflıq prinsipləri üzərində formalaşır. Bizim üçün hər bir üzvün peşəkar münasibəti, intizamlı davranışı və komanda maraqlarına sadiqliyi prioritetdir. Məqsədimiz yalnız idman nəticələri ilə deyil, həm də idarəetmədə sabitlik və institusional etibarla fərqlənməkdir. "DH Volley Baku"da məqsədim yalnız nəticə qazanmaq deyil, dayanıqlı, hörmətə əsaslanan və gələcəyə yönəlmiş bir sistem qurmaqdır.
- Maraqlıdır, qarşıdakı illərdə komandaya tanınmış voleybolçular transfer etməyi planlaşdırırsınız?
- Növbəti illərdə Türkiyə millisində oynamış oyunçu gətirmək istəyirik. Menecerlərimiz bunun üzərində çalışırlar.
