Idman.biz
"Əlimizdən gələni edəcəyik ki, yaxşı nəticə qazana bilək".
Bunu İdman.biz-ə kişi voleybolçulardan ibarət Azərbaycan yığmasının baş məşqçisi Fərid Cəlalov deyib.
Mütəxəssis millimizin Gümüş Avropa Liqasında İsveçə qarşı keçirəcəyi ilk matç haqqında fikirlərini bölüşüb. Məşqçi bildirib ki, hazırlıqlar yüksək səviyyədə keçib: "Bu gün İsveç, sabah Gürcüstan milliləri ilə qarşılaşacağıq. Hazırlığa mayın ayının əvvəlindən başlamışıq. Mayın 29-dan iyunun 2-dək Gürcüstanda yoldaşlıq oyunlarında və təlim-məşq toplanışında iştirak etmişik. Oynadığımız hər iki qarşılaşmada da qalib gəlmişik. Bu oyunlar gənc üzvlərimiz üçün yaxşı təcrübə oldu. Kapitanımız Vüqar Bayramovun dizində problem olduğu üçün heyətdə yer almayıb. Zədə səbəbindən başqa bir neçə itkilərimiz də var. Buna baxmayaraq, Gümüş Liqada da əlimizdən gələni edəcəyik".
Cəlalov heyətdə gənclərin üstünlük təşkil etdiyini xüsusilə vurğulayıb: "Komandaya bacardığımız qədər ölkədə seçilən gənc oyunçuları toplamışıq. Demək olar ki, millinin 90 faizini gəncləşdirmişik. Artıq 25 yaşdan aşağı oyunçular əsas heyətdə iştirak edirlər. İki-üç il bundan öncə isə 35 yaşdan yuxarı oyunçuların komandada üstünlük təşkil etdiyini görə bilərdik. İstəyirik ki, onlar gələcəkdə milli komandanın heyətində oynaya bilsinlər. Çünki nisbətən yaşlı oyunçularımızın bəziləri məşqçilik fəaliyyətinə başlayıb. Federasiyanın yürütdüyü idman siyasətinə uyğun olaraq daha çox gənclərə şans verməyə çalışırıq".
Qeyd edək ki, Azərbaycan – İsveç matçı saat 17:00-da start götürəcək.
Aytac Sahəd
İdman.biz
