Idman.biz
Azərbaycan Voleybol Federasiyasının (AVF) prezidenti Şahin Bağırov III MDB Oyunlarında bürünc medal qazanmış U-15 voleybolçularımızla görüşüb.
İdman.Biz xəbər verir ki, tədbirdə AVF-nin vitse-prezidentləri Faiq Qarayev, Bəhruz Quliyev, baş katib Faiq Orucov, federasiya nümayəndələri, komanda üzvləri, məşqçilər heyəti və valideynlər iştirak ediblər.
Bildirilib ki, görüş zamanı Ş.Bağırov komandanın oyunçularını və məşqçilər heyətini bürünc medal münasibətilə təbrik edib. O, bu uğuru AVF-nin uşaq və yeniyetmə voleybolunun inkişafı istiqamətində həyata keçirdiyi tədbirlərin nəticəsi kimi dəyərləndirib.
Federasiya prezidenti yeniyetmə voleybolçulara daim üzərlərində çalışmağı, gələcəyin güclü və tanınmış voleybolçusu olmaq, əsas millinin heyətində yer almaq üçün ciddi səylə çalışmaları tövsiyə edib. O, onlara qarşıdakı yarışlarda və karyeralarında uğurlar arzulayıb. Valideynlərə də dəstək və diqqətləri üçün təşəkkürünü bildirib.
Tədbirdə çıxış edən Faiq Qarayev, Bəhruz Quliyev və Faiq Orucov uşaq və yeniyetmə voleybolunun inkişafının davam etdirildiyini vurğulayıb, həm qızlar, həm də oğlanlardan ibarət komandaların yaxın gələcəkdə daha böyük uğurlar qazanacağına inamlarını ifadə ediblər.
Komandanın baş məşqçisi Şahin Çatma, yeniyetmə voleybolçular və valideynlər AVF rəhbərliyinə yaradılan şərait və voleybolun inkişafı istiqamətində görülən işlərə görə təşəkkürlərini bildiriblər.
Görüş xatirə şəkli ilə yekunlaşıb.
