Idman.biz
Azərbaycanın qadınlardan ibarət "Turan" voleybol komandası CEV Çempionlar Liqasının qrup mərhələsinə vəsiqə qazanmaq üçün həlledici qarşılaşmaya hazırlaşır.
İdman.Biz Avropa Voleybol Konfederasiyasının (CEV) rəsmi saytına istinadən xəbər verir ki, Tovuz təmsilçisi noyabrın 10-da üçüncü təsnifat mərhələsinin cavab oyununda Bolqarıstanın "Maritsa" komandasını qəbul edəcək.
Azərbaycan çempionu Avropa arenasında uğurlu çıxışını davam etdirir. İkinci təsnifat mərhələsində Xorvatiyanın "Mladost" komandasını hər iki görüşdə məğlub edən "Turan" üçüncü mərhələnin ilk matçında da inamlı qələbə qazanıb.
Tovuz təmsilçisi Bolqarıstanda "Maritsa"nı 3:0 hesabı ilə məğlub edərək cavab oyunu öncəsi ciddi üstünlük əldə edib.
Komandanın baş məşqçisi Ziya Rəcəbov ilk görüşdəki nəticəyə baxmayaraq, rəqibi qiymətləndirməməyin vacibliyini vurğulayıb:
"Plovdivdəki ilk oyunda komandamız güclü çıxış edərək 3:0 hesablı qələbə qazandı. Voleybolçularımız həm hücumda, həm də müdafiədə üzərlərinə düşən vəzifələri yaxşı yerinə yetirdilər. Xüsusilə blok və servis zamanı göstərdiyimiz oyun nəticədə mühüm rol oynadı. Lakin bu üstünlüyə baxmayaraq, cavab qarşılaşmasına tam diqqətlə hazırlaşırıq".
Mütəxəssis voleybolda hər setin əhəmiyyətli olduğunu bildirib:
"Voleybolda hər set vacibdir və oyunun gedişatı çox sürətlə dəyişə bilər. "Maritsa" güclü rəqibdir və cavab görüşündə daha aqressiv çıxış edəcəyini gözləyirik. Əsas məqsədimiz oyun üslubumuzu qorumaq, top qəbulunda sabitliyi təmin etmək, hücumda effektiv olmaq, blok və müdafiədə intizamı saxlamaqdır. Tovuzda azarkeşlərimizin dəstəyi ilə oynamaq bizə əlavə motivasiya verəcək. İnanıram ki, komandamız qrup mərhələsinə vəsiqə qazanmaq üçün əlindən gələni edəcək".
"Turan"ın liberosu Yuliya Kərimova da komandanın həlledici görüşə hazır olduğunu açıqlayıb:
"Hazırlıq dövrü məhsuldar keçib. Taktiki cəhətdən çox çalışmışıq və rəqibin güclü, zəif tərəflərini təhlil etmişik. Komandamız ən yaxşı voleybolunu nümayiş etdirmək əzmindədir. Bu səviyyədə hər qarşılaşma vacibdir. Məsuliyyətimizi anlayırıq və hər xal uğrunda mübarizə aparmağa hazırıq. İntizam, komanda işi, diqqət və məşqçinin tapşırıqlarına əməl etmək əsas amillər olacaq. Biz bir komandayıq, bir-birimizə dəstək oluruq və azarkeşlərimizi qürurlandırmaq üçün hər şeyimizi ortaya qoymağa hazırıq".
Qeyd edək ki, "Turan" cavab qarşılaşmasında iki set qazanacağı təqdirdə CEV Çempionlar Liqasının qrup mərhələsinə vəsiqəni təmin edəcək.
