Idman.biz
Azərbaycanda qadın voleybolçular arasında Super Liqanın yeni mövsümü bu gün başlayacaq.
İdman.Biz xəbər verir ki, birinci turun açılış günündə iki görüş baş tutacaq.
Hər iki qarşılaşma saat 16:00-da start götürəcək.
Milli Aviasiya Akademiyasının komandası doğma meydanda ötən mövsümün bürünc mükafatçısı "Gəncə"ni qəbul edəcək. Bu kollektivlər ötən mövsüm üçüncü yer uğrunda mübarizə aparıblar.
Günün digər görüşündə isə çempionatın debütantları "Azərmaş Abşeron" və "Naxçıvan" komandaları üz-üzə gələcəklər. Qarşılaşma Gənclər və İdman Nazirliyinin Voleybol Mərkəzində keçiriləcək.
Qeyd edək ki, qadınlar arasında Super Liqanın yeni mövsümü kişilərin analoji yarışından iki həftə sonra başlayır. Kişi voleybolçular arasında çempionata oktyabrın 23-də start verilib.
