Sport24.az
Voleybol üzrə Braziliya Kubokunun qalibi olan Azərbaycan millisinin üzvü Polina Rəhimovanın AZƏRTAC-a danışıb. Sport24.az həmin müsahibəni təqdim edir.
- Çıxış etdiyiniz "Osasko" klubu 7 ildən sonra Braziliya Kubokunun sahibi oldu. Final qarşılaşması barədə təəssüratlarınızı bilmək maraqlı olardı…
- Bəli, 7 ildir kuboku qazana bilmirdik. Komandama kömək edə bildiyim üçün çox sevinirəm. Xoşbəxtəm ki, bunu bacardıq. Finalda son Braziliya çempionu "Minas"la qarşılaşdıq. Belə güclü rəqibə qarşı sonadək mübarizə apardıq və qalib gəldik. Mən matçın son dəqiqələrində risk alaraq topu meydanın rəqibə aid hissəsində yerə atdım və nəticədə dördüncü seti üstünlüklə başa vurduq.
- Finalda məğlub etdiyiniz rəqib sizin keçmiş komandanız olub. Onlara qarşı oynamaq necə hiss idi?
- Finaldan bir gün öncə keçirilmiş yarımfinal oyunumuz çox gec yekunlaşdı. Rəqib komandanın matçı isə daha erkən saatlarda bitmişdi. Onlar 4, biz isə 5 set oynamışdıq. Bu səbəbdən özümüzü çox yorğun hiss edirdik. Həlledici matçda keçmiş komandamla qarşılaşanda tanış simaları, əvvəllər geyindiyim gözəl və rəngarəng formanı görəndə çox sevindim. Onlar möhtəşəm iş gördülər. Görüşə kifayət qədər yaxşı hazırlaşmışdılar. Müdafiə və blokda çox güclü idilər. Bir sözlə, finalda oynamağa layiq idilər.
- Hazırda "Osasko" Superliqada 35 xalla dördüncü sırada yer alır. Komandanızın Braziliya çempionatında hədəfləri nələrdir?
- Təbii ki, çempion olmaq istəyirik. Hazırda 6 əsas oyunçumuzdan ikisi zədəlidir və bu, bizi axsada bilər. Ümid edirəm ki, yeni oyunçular kollektivə tez adaptasiya olacaqlar və biz turnir cədvəlində yüksək pillələrdə qərarlaşan komandalarla görüşlərdə qələbə qazana biləcəyik.
- Avropaya qayıtmağı düşünürsünüz?
- Hazırda bütün diqqətimi Braziliyadakı komandama və hədəflərimizə yönəltmişəm. Nəyin necə olacağına daha sonra qərar verəcəyəm. Gələcək haqqında düşünmək hələ tezdir. Hazırda titullar qazanmağa davam etməliyəm.
- Azərbaycan millisi bu il Qızıl Avropa Liqasında çıxış edəcək. Yığmanın şanslarını necə dəyərləndirirsiniz?
- Əminəm ki, komandamızın turnir üçün yüksək hədəfləri var. Biz gənc nəslə daha çox diqqət yetirməli, onlara kömək etməli və dəstək olmalıyıq. Azərbaycan Voleybol Federasiyası regionlarda bu idman növünün inkişafı üçün böyük işlər görür. Bunun sayəsində biz daha çox yerli istedadlar yetişdirə bilərik. Milli komandada azərbaycanlı voleybolçuların oynamağı olduqca vacibdir. Çünki bəzi çətin matçlarda vətənpərvərlik uğur qazanmaq baxımından böyük rol oynayır. İnanıram ki, Azərbaycan voleybolunu yenidən dünyaya tanıdan ucaboy və perspektivli voleybolçular yetişəcək.
- Milli komandanın ulduzlarından biri hesab olunursunuz. Əgər dəvət gəlsə, yenidən yığmanın formasını geyinəcəksiniz?
- Buna Braziliyada mövsümü başa vurduqdan sonra qərar verə bilərəm. Hazırda bu suala cavab olaraq nə "yox", nə də "hə" deyə bilərəm.
- Azərbaycan klublarından təklif almısınız?
- Bəli, məşqçi kimi çalışmaq təklifi almışam. Amma hazırda bütün diqqətimi idmançı karyerama yönəltmişəm. Təcrübəm olmasa belə, kiminsə mənə məşqçi kimi ehtiyac duyduğunu bilmək çox xoşdur. Bu, özümə olan güvəni və Azərbaycanda qapıların mənə hər zaman açıq olduğuna dair inamımı daha da artırır.
