Sport24.az
Azərbaycan və Türkiyə komandalarının iştirakı ilə Naxçıvanda yeniyetmə qızlar arasında voleybol üzrə "Muxtariyyət kuboku" uğrunda birincilik keçiriləcək. Sport24.az Naxçıvan Voleybol Federasiyasının rəsmi səhifəsinə istinadən xəbər verir ki, Azərbaycan Voleybol Federasiyasının dəstəyi ilə keçiriləcək yarışda U-16 Azərbaycan millisi, Gəncə, Sumqayıt, Tovuz, Şərqi Zəngəzur Regional Voleybol klublarının komandaları, qardaş Türkiyənin Əskişəhər və İğdır şəhərlərinin komandaları və Naxçıvan komandası iştirak edəcək.
Yarış Azərbaycanın çoxəsirlik zəngin keçmişində layiqli yer tutan, ictimai-siyasi və elmi-mədəni həyatında özünəməxsus rol oynayan, türk dünyası üçün strateji məkan olan ulu Naxçıvan diyarında muxtariyyətin əldə edilməsinin 100 illik yubileyinə həsr olunub. 4-7 sentyabr 2024-cü il tarixlərində təşkil olunacaq birinciliyə Naxçıvan şəhərindəki İlham Əliyev adına Olimpiya İdman Kompleksi "ev sahibliyi" edəcək.
