"Klub mövsümü yeni bitib, bir neçə günlük istirahətdən sonra milli komandanın bazasında toplaşdıq".
İdman.biz xəbər verir ki, bunu voleybolçu kişilərdən ibarət Azərbaycan yığmasının kapitanı Vüqar Bayramov deyib.
Kapitan millinin Qızıl Avropa Liqasında çıxışına toxunub. Bayramov yığmamızın rəqiblərinin güclü olduğunu bildirib: "Mayın 17-də mübarizəyə başlayırıq. 1-ci turun qarşılaşmaları Bakıda olacaq. Rəqiblərimiz Ukrayna və Rumıniya güclü komandalardır. Qarşılaşmalar çətin olacaq. Bu il yığma komandamızda gənc oyunçular da çoxdur. Əsas voleybolçularımızdan zədəsi olanlar var. Buna baxmayaraq, biz əlimizdən gələni edəcəyik ki, yaxşı oynayaq və uğurlu nəticə qazanaq".
Qeyd edək ki, Azərbaycan yığması Qızıl Avropa Liqasında mayın 17-də Rumıniyaya, 2 gün sonra isə Ukrayna ilə qarşılaşacaq.
İdman.biz