Idman.biz
Azərbaycanın qadınlardan ibarət voleybol millisi Avropa Qızıl Liqasının startındakı uğursuzluq seriyasını dayandıracağına ümid edir. Bakıda Macarıstan və Sloveniya ilə oyunlarda eyni 0:3 hesabı ilə məğlub olan yığmamızı Bratislavada həlledici qarşılaşmalar gözləyir. Məhz bu görüşlər komandanın hazırda yüksək hədəflərə nail ola bilib-bilməyəcəyinə aydınlıq gətirəcək.
İdman.biz xəbər verir ki, Faiq Qarayevin yetirmələri iyunun 6-da meydan sahibləri ilə qarşılaşacaqlar.
Slovakiya komandası Avropa Qızıl Liqasına Yunanıstana məğlubiyyətlə başlasa da, ardınca Xorvatiyaya qlaib gəlib. Komandanın baş məşqçisi Mixal Maşek Azərbaycanla qarşılaşma ərəfəsində rəqibi çox ciddi şəkildə analiz etdiklərini bildirib: "Köməkçilərimlə birlikdə gecə saat 3-ə qədər Azərbaycan komandasını analiz etdik. Bu, hündür boylu oyunçuları olan keyfiyyətli bir komandadır. Evdəki ilk oyunumuza yaxşı hazırlaşmaq bizim üçün çox vacibdir. Hələ növbəti rəqibimiz Monteneqro ilə bağlı tam təhlil aparmamışıq, amma bunun üçün vaxtımız olacaq".
Maşek əlavə edib ki, turnirin ilk oyununda Yunanıstana 0:3 hesablı məğlubiyyət komandası üçün "yaxşı dərs" olub: "Lakin uğursuz başlanğıcdan sonra komandamız toparlandı və Xorvatiyaya qalib gəldi. İnanıram ki, bu, bizim üçün vacib olan evdəki oyunlarda öz bəhrəsini verəcək. İnanıram ki, tribunalarda çoxlu azarkeş olacaq və Azərbaycan və Monteneqro ilə oyunlarda uğurlu çıxış edəcəyik".
Slovakiya millisinin kapitanı Karin Paltuqova da uğurlu nəticə gözlədiyini bildirib: "Doğma meydanda oynamaq həmişə böyük şərəfdir. Bu matçlar daha emosional olacaq, əsl voleybol festivalı yaşanacaq. Biz qalib gələcəyik. Rəqiblərin bizim səviyyəmizdə olduğuna inanırıq. Azərbaycan və Monteneqro ilə oynamaq mümkündür. Taktiki, fiziki və mənəvi cəhətdən yaxşı hazırlaşmalıyıq".
Aydın məsələdir ki, voleybolçularımızı çox çətin oyunlar gözləyir. Bakıda keçirilən ilk görüşlər göstərdi ki, komandanın çoxlu problemləri var və bunları qısa müddətdə aradan qaldırmaq asan deyil. Bratislava mərhələsi öncəsi komandamızın passvericisi Yana Doroşenko qeyd edib ki, start oyunlarında, əsasən, taktiki səhvlər və qəbul zamanı yaşanan çətinliklər uduzmağa səbəb olub.
Bratislavada vəziyyəti düzəltmək və daha yaxşı çıxış etmək vacibdir. Çünki ilk turlardan sonra Azərbaycan millisi Avropa Qızıl Liqasında cədvəlinin sonuncu pilləsində qərarlaşıb və artıq qalib gəlmək vaxtıdır. Komandamız iyunun 6-da Slovakiya, ertəsi gün isə Monteneqro ilə qarşılaşacaq.
Zəki Feyzullayev
İdman.biz
