Idman.biz
"Əlimizdən gələni edəcəyik ki, növbəti oyunlarda qələbə qazanaq".
İdman.biz xəbər verir ki, bunu qadın voleybolçulardan ibarət Azərbaycan yığmasının məşqçisi Famil Ağayev deyib.
O, Azərbaycan Voleybol Federasiyasının mətbuat xidmətinə açıqlamasında Bakıda təşkil olunan Avropa Qızıl Liqasının birinci turu haqqında fikirlərini bölüşüb. Macarıstan və Sloveniyaya uduzan mütəxəssis bildirib ki, görüşlər maraqlı alınıb: "Sloveniyaya ilə 0:3 hesablı məğlubiyyətə baxmayaraq, gərgin görüş keçdi. Fikrimcə, izləyicilərə yaxşı oyun nümayiş etdirə bildik".
Məşqçi məğlubiyyətin səbəblərindən danışıb: "Sloveniya ilə oynadığımız kimi Macarıstanla oynasaydıq, tam fərqli nəticə olardı. Oyunda səhvlərimiz çox oldu. Ola bilər ki, birinci matç olduğu üçün gərginlik vardı. Hər qələbə komandanı daha da irəli aparır. Yığmada olmayan oyunçular çoxdur. Əgər bu gün onlar burada olsaydı, komanda fərqli oyun nümayiş etdirə, qələbə qazana bilərdik. Bu gün çıxış edən voleybolçularımıza da təşəkkür edirəm ki, əllərindən gələni etdilər. Bundan sonra isə ikinci tura hazırlaşacağıq. Düzdür, vaxtımız azdır. Ancaq yaxşı nəticə üçün əlimizdən gələni edəcəyik".
Qeyd edək ki, Azərbaycan millisini qarşıda dörd səfər oyunu gözləyir. Yığmamız iyunun 6-da Slovakiya, 7-də Monteneqro, 13-də Xorvatiya və 14-də Rumıniya ilə görüşəcək.
İdman.biz
