İdman.biz
"Güclü rəqibə qarşı mübarizə apardıq".
Bunu İdman.bizə kişi voleybolçulardan ibarət Azərbaycan millisinin baş məşqçisi Fərid Cəlalov deyib.
O, AVRO-2026-nın seçmə mərhələsinin ilk oyununda Avstriyaya 0:3 hesablı məğlubiyyətin səbəblərini açıqlayıb. Cəlalovun sözlərinə görə, voleybolçularımız matçın ikinci seti bir qədər inamlı təsir bağışlayıblar: "Komanda bu setdə daha çox əzimkarlıq göstərdi. Lakin təcrübəsizlik öz sözünü dedi. Heyətin 80 faizi gənclərdən ibarətdir. Cəmi 3-4 təcrübəli oyunçunu milliyə cəlb etmişik. Qələbə üçün məhz təcrübəmiz çatmadı. Üçüncü setdə topu qəbul zamanı xeyli yanlışlıqlara yol verdik. Rəqibin heyətində Avropanın çox güclü və tanınmış klublarında çıxış edən oyunçuları var. Bu baxımdan yetəri qədər mütəşəkkil formada olan bir milliyə qarşı oynadıq. Bu cür oyunlar təcrübəmizin və səviyyəmizin artmasına səbəb olacaq".
O, ilk matçdakı səhvlərə Belçika yığması ilə oyunda yol verməyəcəklərini də bildirib: "Hər bir şeyi yenidən analiz edib, məşqlərimizi bunun üzərində quracağıq. Səhvlərimizdən nəticə çıxarıb, daha yaxşı mübarizə aparacağıq".
Qeyd edək ki, yığmamız Belçika millisi ilə avqustun 24-də qarşılaşacaq.
Banuçiçək Hüseynli
İdman.biz
