Idman.biz
Qadın voleybolçulardan ibarət "Abşeron" klubunun baş məşqçisi Famil Ağayevin İdman.biz-ə müsahibəsi
- Yüksək Liqanın ikinci final oyununda çempionluğu əldən verdiniz. Matçı necə dəyərləndirirsiz?
- Çox pis.
- İlk matçda 3:0 hesabı ilə qalib gəlsəz də, ardınca eyni hesabla uduzduz və "Qızıl set"də də "Azərrel" üstün oldu. Sizcə, oyununuz niyə alınmadı?
- Bir neçə səbəb var. Əvvəla, mövsümdə "Azərreyl"lə beş dəfə qarşılaşmışıq. Bu matçların hamısından qalib ayrılmışıq. Finalın ikinci qarşılaşmasından da öncə düşündük ki, ilk görüşdə 3:0 qələbə qazanmışıq, bu dəfə iki set də bizə bəs edəcək. Bəlkə də dünənki məğlubiyyət məhz bu arxayınlığın nəticəsidir. Üstəlik, komandamızda stress, həyəcan vardı. Məsələn, birinci seti uduzduq, o məyusluqla da ikinci hissədə oyunun gedişatını itirdik. "Azərreyl" də bundan çox yaxşı istifadə etdi. İstər müdafiədə, istərsə də hücumda fərqlənməyi bacardı. Düşünürəm ki, həm arxayınlıq, həm də həyəcan məğlubiyyətin əsas səbəbləridir. Üstəlik, başqa zalda oynayırdıq. Bu, qətiyyən bəhanə deyil, gedişata təsir edən əsas faktorlardan biridir.
- Oyunun əldən getdiyini gördükdən sonra aparıcı voleybolçulara istirahət verib "Qızıl set"ə fokuslanmaq olmazdı?
- İlk iki hissədə məğlub olanda belə "Qızıl set" haqda düşünmürdüm. İstəyirdim ki, oyunun gedişatında vəziyyəti dəyişək. "Qızıl set" elədir ki, hər iki tərəf bir anın içində qalıb də gələ bilər, nəticə etibarilə cəmi 15 xaldır. Orada da "Azərreyl" çox yaxşı oynadı.
- Məğlubiyyətdən sonra klub rəhbərliyi ilə söhbətiniz oldu?
- Xeyr, heç bir söhbətimiz olmayıb. Hazırda əsəblər çox gərgindir.
- Artıq "Abşeron"la müqavilənizin bitdi. Komandanın "sükanı arxası"nda qalacaqsız, yoxsa yollar ayrılacaq?
- Komandadan ayrılacağıma dair hər hansı söhbətimiz olmayıb. Bu idmandır, udmaq da var, uduzmaq da. Finaldan öncə növbəti mövsümün proqramı ilə bağlı müzakirələrimiz olmuşdu. Yəqin ki, yaxın günlərdə rəhbərliklə görüşəcəyik.
- Ümumiyyətlə, gələcək karyeranızla bağlı nə düşünürsünüz?
- Yaxın müddətdə milli komandanın oyunları başlayır. Orada Faiq Qarayevin köməkçisi vəzifəsində çalışıram və qarşıda bizi Qızıl Avropa Liqası yarışı gözləyir.
- Bəs gümüş medalçı "Abşeron"un avrokubokda iştirakı rəsmiləşib?
- Məğlubiyyətdən sonra bu haqda danışmaq tez olar. Bunu zaman göstərəcək. Klub rəhbərliyi istəsə, avrokuboklara gedəcəyik.
- Voleybolçunuz Ecem Aknam ikinci final oyunundan sonra verdiyi açıqlamada vurğuladı ki, uduzmağınıza baxmayaraq, mövsüm çox uğurlu alınıb. Onunla razısınız?
- Bu mövsüm çox yaxşı çıxış etdik və qazandığımız nəticələrə görə digər komandalardan fərqlənməyi bacardıq. Azərbaycan kubokunu qazandıq, mövsüm də bizim üçün kifayət qədər uğurlu keçdi. Ölkə çempionatında cəmi iki oyun uduzmuşuq. Bu, çox yaxşı nəticədir. Ancaq təəssüf ki, çempionatda qazanılan qələbələrdən asılı olmayaraq, əsas məsələ final oyunudur. Orada uduzursansa, bütün mövsüm boyu qazandıqlarını bir anda itirirsən. Necə ki, dünən biz bunu yaşadıq.
Aytac Sahəd
İdman.biz
