Sport24.az
Çimərlik voleybolçularımız Latviya açıq çempionatında gümüş medal qazanıblar
Çimərlik voleybolu üzrə kişilərdən ibarət Azərbaycan millisi Latviya açıq çempionatında iştirak edib. Sport24.az xəbər verir ki, 2 gün davam edən yarışda ümumilikdə 8 komanda mübarizə aparıb.
Ölkəmiz açıq çempionatda iki cütlə (Məhəmməd Aslanlı/İbrahim Məmmədov və Heydər Məmmədli/Nəriman Bayramlı) çıxış edib. Olimpiya sistemi ilə keçirilən turnirdə komandamız uğurla çıxış edərək mükafatçılar sırasında yer alıb.
Heydər Məmmədli/Nəriman Bayramlı cütü yarışın gümüş medallarına sahib çıxıblar. Digər təmsilçilərimiz isə (Məhəmməd Aslanlı/İbrahim Məmmədov) dördüncü yeri tutublar.
Qeyd edək ki, fevralın 23-dək Latviyada təlim-məşq toplanışı keçəcək çimərlik voleybolçularımız burada daha bir neçə turnirdə iştirak edəcəklər.
