Idman.biz
Azərbaycan Voleybol Federasiyasının baş katibi Faiq Orucovun AZƏRTAC-a müsahibəsi:
- Yeni mövsümdə komanda sayı artacaq? Artıq "DH Volley Baku" klubu yaradılıb. Kişilərdə və qadınlarda daha neçə kollektivin debütü gözlənilir?
- Yüksək Liqada iştirak edən klubların sayının artması çempionatın daha baxımlı olması ilə nəticələnir. Bu baxımdan komanda sayının artırılması istiqamətində müvafiq işlər görülür. Artıq qadınlardan ibarət "DH Volley Baku" komandasının çempionatda iştirakı rəsmiləşib. Yaxın zamanlarda yeni mövsümdə iştirak edəcək komanda sayı və digər məsələlərlə bağlı açıqlamalar ictimaiyyətə təqdim olunacaq.
- Növbəti il Azərbaycanı kişi və qadınlar arasında avrokuboklarda hansı komandalar təmsil edəcək? Konkret olaraq, hansı klublar Avropada oynamaqdan imtina edib?
- Bildiyiniz kimi, komandalar avrokuboklarda iştirakla bağlı federasiyaya iyun ayının ortalarına kimi müraciət edə bilərlər. Hazırda isə bununla bağlı bizə klublar tərəfindən müraciət daxil olmayıb.
- Kişilərdən ibarət milli komandanın hazırkı baş məşqçisi Fərid Cəlalov yeni yaradılan "DH Volley Baku" klubunun baş məşqçisi oldu. O, yığmadakı işinə də davam edəcəkmi?
- Kişi voleybolçulardan ibarət milli bu il Avropa Gümüş Liqasında mübarizə aparacaq. Milli komandamız Fərid Cəlalovun baş məşqçiliyi ilə artıq yarışa hazırlıqlara başlayıb.
- Qarşıda qadınları Avropa Qızıl Liqası, kişiləri isə Avropa Gümüş Liqası gözləyir…
- Qeyd etdiyim kimi, həm qadın, həm də kişilərdən ibarət milli komandalarımız hər iki turnir üçün hazırlıqlara başlayıblar. Məşqlərə gənc və perspektivli oyunçular da cəlb olunublar. Hazırlıq çərçivəsində yoxlama görüşlərinin keçirilməsi də nəzərdə tutulur.
- Bu turnirlərdə Azərbaycan yığmaları nəyə ümid edə bilər?
- Əlbəttə ki, yığmaların hədəfi yarışda yaxşı çıxış edib, növbəti mərhələlərə vəsiqə qazanmaq və ölkəmizi layiqincə təmsil etməkdir. Hər iki milli komandamıza uğurlar arzu edirik.
İdman.biz
