Idman.biz
Azərbaycanın hazırkı voleybol çempionu olan "Azərreyl" qadın komandası ölkənin Yüksək Liqasındakı son iki oyunda uğursuzluğa düçar olub. Mövsümə "Gəncə" klubuna qarşı qələbə ilə başlayan "Azərreyl", növbəti görüşlərdə "DH Volley" (2:3) və UNEC (0:3) komandalarına uduzub.
İdman.Biz son oyun və başqa məqamlarla bağlı klubun legionerləri - ABŞ-dən olan Medison Bleyn və Cənubi Koreyadan olan Sol Ku ilə söhbət edib.
- Komandanın UNEC ilə oyunda nə alınmadı?
Medison Bleyn:
- Mənə elə gəlir ki, UNEC əla çıxış etdi: rəqib servislərlə bizə ciddi təzyiq göstərirdi. Onlar çox aqressiv şəkildə oynayırdılar və buna görə bizim üçün topu keyfiyyətli qəbul etmək çətin idi. Bu da hücumları tamamlamağımızı çətinləşdirirdi. Kollektiv şəkildə öz işimizin öhdəsindən gələ bilmədik.
Bəlkə də məndə blokda hər şey alınmırdı, həmçinin bütün komandanın top atışı zəif idi. Bizim günümüz deyildi. Ard-arda çox səhvlər etdik ki, bu da öz oyunumuzu diktə etməyə imkan vermədi. UNEC isə təzyiqə tab gətirdi və çox özünəinamlı oynadı, əhsən! Növbəti dəfə mütləq özümüzü daha yaxşı göstərəcəyik.
Sol Ku:
- Medisonla razıyam. UNEC ilə oyundan sonra kədərlənmişdim, çünki bilirəm ki, biz nə qədər motivasiyalıyıq. Enerjimiz vardı, amma bacardığımız hər şeyi göstərə bilmədik. Bilmirəm, məsələ nədə idi... Buna görə də mənə pis oldu, amma əminəm ki, növbəti dəfə daha yaxşı çıxış edəcəyik."
- Əsas rəqibiniz kimdir?
Medison Bleyn:
- Biz cəmi üç oyun keçirmişik, buna görə bütün komandaları görməmişik. Amma bizim "Turan"la hazırlıq oyunumuz olmuşdu. Bu, çox layiqli rəqibdir: güclü blok, servis, hücumlar. Məncə, indiyə qədər gördüyümüz kollektivlər arasında onlar bizim üçün ən böyük təhlükəni təmsil edirlər.
Sol Ku:
- Mən də razıyam. "Turan" hələlik ən ciddi rəqib kimi görünür.
- Azərbaycan çempionatının səviyyəsini əvvəllər oynadığınız liqalarla müqayisədə necə qiymətləndirərdiniz?
Medison Bleyn:
- İlk dəfədir xaricdə oynayıram, ona görə də qiymət vermək çətindir. Bura gələndə nəylə qarşılaşacağımı bilmirdim, amma hələlik hər şey xoşuma gəlir. ABŞ-də çoxlu liqalar var. Məsələn, mən orta səviyyəli universitet liqasının birinci divizionunda çıxış etmişdim və düşünürəm ki, o, Azərbaycanın çempionatına oxşayır.
Sol Ku:
- Xaricdə ikinci oyun təcrübəmdir. Ötən il Fransanın ikinci divizionunda çıxış etmişdim, bundan əvvəl isə Koreya liqasında oynamışdım. Buradakı çempionatın səviyyəsi mənə çox xoşdur – o, həqiqətən yüksəkdir. Buna görə də Azərbaycanda oynayaraq növbəti mövsüm üçün ustalığımı xeyli artıra bilərəm. Fikrimcə, səviyyə Fransanın liqasına bənzəyir. Koreya çempionatı isə tamamilə fərqlidir, bunu təsvir etmək çətindir: idman zallarından tutmuş məşqçilərə qədər hər şey başqadır.
- Bura gəlməzdən əvvəl Azərbaycan voleybolu barədə nəsə bilirdinizmi?
Sol Ku:
- Eşitmişdim, çünki əvvəllər burada koreyalı voleybolçu çıxış etmişdi. O, möhtəşəm toppaylayıcı idi. Amma ölkə haqqında çox şey bilmirdim. Əlbəttə, onunla burada oynadığı vaxtlar barədə danışmaq istərdim. Ancaq o, artıq təqaüdə çıxıb, məndən böyükdür və o qədər görkəmli idmançıdır ki, onun uğurlarına çatmaq belə mümkün deyil.
Medison Bleyn:
- Dediyim kimi, peşəkar beynəlxalq voleybolda yeniyəm. Ancaq müqavilə imzaladıqdan sonra Azərbaycandakı voleybol haqqında daha çox öyrənməyə başladım. Azərbaycanlı voleybolçuların keçmiş nailiyyətləri haqqında həqiqətən çox yaxşı şeylər eşitmişəm. Və mən məmnuniyyətlə kömək edərdim ki, Azərbaycanda voleybol yenidən əvvəlki səviyyəsinə qayıtsın.
Leyla Eminova
