Idman.biz
Kişilər arasında voleybol üzrə Çempionlar Liqasının birinci təsnifat mərhələsinin ilk oyununda Serbiyanın "Radniçki" klubuna 0:3 (21:25, 18:25, 22:25) hesabı ilə uduzan "Azərreyl" artıq cavab görüşünə hazırlaşır.
Bu barədə İdman.Biz-ə klubun kapitanı Roman Merkuşov danışıb.
"Deyəcək çox şey yoxdur, bu, təbii ki, məyusedici məğlubiyyətdir. Görüşün əvvəlində təşəbbüs bizdə idi və hesabda irəlidə idik, lakin sonra rəqib oyunun taktikasını dəyişdi, bizi servislərlə sıxdı və daha çox səhv etməyə məcbur etdi. Ümumilikdə, oyuna bizim hücumda, top qəbullarında etdiyimiz çoxsaylı səhvlər təsir etdi və bu da yekun nəticədə özünü göstərdi. Rəqibin oyunu bizi risk etməyə vadar etdi və biz tez-tez səhvlərə yol verirdik", - deyə Merkuşov bildirib.
"Ola bilsin, nəticə arzuolunan deyildi, amma qarşıdakı cavab oyununda, 29 oktyabrda Serbiyada, toparlanıb döyüşməyə vaxtımız var. Məğlubiyyətdən dərhal sonra bu qarşılaşmaya hazırlaşmağa başladıq", - komandanın kapitanı vurğulayıb.
Vüqar Vüqarlı
