"Xilasedici"yə qarşı çox gözəl komanda oyunu göstərdik". Sport24.az xəbər verir ki, bunu İdman.biz-ə "Azərreyl"in voleybolçusu Vüsal Rüstəmov deyib.

Komandasının kapitanı Azərbaycan Yüksək Liqasının VIII turunda qarşılaşdıqları "Xilasedici" ilə oyunu şərh edib. O bildirib ki, 3:1 hesabı ilə qalib gəldikləri matç kifayət qədər gərgin keçib: "Həm biz, həm də rəqib qarşılaşmaya yaxşı hazırlaşmışdıq. "Xilasedici" oyun boyu çox güclü təzyiq göstərdi. Ancaq qələbə qazanacağımıza inanırdıq. İlk setdə üstün olduq. İkinci hissədə rəqib hesabı bərabərləşdirsə də, həvəsdən düşmədik, sona qədər mübarizə apardıq. Üçüncü və dördüncü setləri öz hesabımıza yazaraq qalib gəldik. Ümumi turun nəticəsinə baxsaq, "Neftçi" MOİK üzərində 3:0 hesablı qələbə qazandı, "Murov Az Terminal" isə "Gənclər"i eyni hesabla məğlub etdi. Ancaq deyərdim ki, turun ən baxımlı matçı bizimki oldu".

Rüstəmov bildirib ki, son 2 tur "Azərreyl" üçün uğurlu olub: "Həm "Neftçi", həm də "Xilasedici" üzərində qələbə qazandıq. "Murov Az Terminal"a məğlub olsaq da, bu bizi həvəsdən salmadı. Ümid edirəm ki, bundan sonra daha da yaxşı çalışıb, növbəti oyunlarda qələbə qazanacağıq. Qarşıda oyunlarımız var. Həmin görüşlərə çox ciddi hazırlaşmalıyıq. Daha yaxşı yerlərə qalxmağı hədəfləyirik. Ardınca pley-off və final mərhələləri olacaq. Müntəzəm çempionatda yaxşı bir mövqe qazana bilsək, həlledici görüşlər də bizə rahat olar".

Qeyd edək ki, "Azərreyl" 16 xalla turnir cədvəlində üçüncüdür.