Sport24.az
"Məşqçilər heyəti rəqib komandanın oyununu yaxşı analiz etmişdi". Sport24.az xəbər verir ki, bunu "Azərreyl"in hücumçusu Sergey Platanenkov Azərbaycan Voleybol Federasiyasının mətbuat xidmətinə açıqlamasında deyib.
O, Yüksək Liqada X turda "Murov Az Terminal"la qarşılaşmanı şərh edib: "Komanda olaraq yaxşı oynadıq. Ona görə də bizdə hər şey alındı. Qarşıdakı vəzifələrimizə gəldikdə, hazırda çempionat daha maraqlı olub. Çünki hər komanda bir-birinə qalib gəlməyə başlayıb. Əvvəllər bəlli favoritlər və autsayderlər var idi. İndi isə turnir cədvəlindəki ilk dörd komanda arasında hansı tərəfin qələbə qazanacağı əvvəldən bilinmir. Hazırda əsas məsələ ruh yüksəkliyini qorumaq və belə oynamağa davam etməkdir".
Qeyd edək ki, "Azərreyl" 10 turdan sonra 19 xalla turnir cədvəlində üçüncü yerdə qərarlaşıb. Onlar birinci pillənin sahibi "Murov Az Terminal"dan 5 xal geri qalırlar.
