Idman.biz
Gənclər və İdman Nazirliyinin ilin yekunlarına həsr olunmuş ənənəvi sorğusunda "İlin ən yaxşı qadın komandası" nominasiyasında qadın voleybol klubu "Azərreyl" qalib olub.
Bununla əlaqədar İdman.Biz artıq ikinci mövsümdür bu kluba rəhbərlik edən komandanın baş məşqçisi - italiyalı mütəxəssis Paolo Toffolidən qısa müsahibə götürüb.
- Cənab Toffoli, "Azərreyl"in ilin ən yaxşı qadın komandası seçiləcəyini gözləyirdinizmi? Bu nəticə klubunuzun gücündən, yoxsa digər Azərbaycan qadın komandalarının zəifliyindən xəbər verir?
- İlk növbədə onu deyim ki, "Azərreyl" böyük ənənələrə malik klubdur və komandanın gücü bu gün ortaya çıxmayıb. Keçən il çox çətin oldu, çünki mövsüm ərzində düz beş oyunçunu dəyişdik. Komanda tam şəkildə yalnız martın əvvəlində formalaşdı, aprelin 24-də isə çempion olduq. Ötən mövsümün ən güclü komandası "Abşeron" idi, amma biz özümüzə inanırdıq və nəticədə qalib gəldik.
Çempionata gəlincə, komandalar arasında daha çox balans olmalıdır. Məsələn, bu il iki klub var - "Turan" və "DH Volley" - onların büdcəsi digərləri ilə müqayisədə iki-üç dəfə çoxdur. Faktiki olaraq, onlardan yalnız qələbələr gözlənilir və bu səbəbdən onlarla rəqabət aparmaq çox çətindir.
- Bəs ümumilikdə qadınlarla işləmək çətin deyil? Məsələn, şəxsən sizin üçün kiminlə ortaq dil tapmaq daha asandır - evdə həyat yoldaşınızla, yoxsa Bakıda komanda ilə? Həyat yoldaşı ilə voleybolçular arasında hansı oxşar və fərqli cəhətlər var?
- Əlbəttə, çətindir, amma bu xoş bir çətinlikdir. Qadın komandası ilə işləmək kişi komandası ilə işləməkdən fərqlənir. Hesab edirəm ki, istər ailədə, istərsə də işdə qadın cinsinin bütün nümayəndələri ilə ünsiyyətdə hər sözü ölçüb-biçmək lazımdır, çünki qadınlar çox həssasdırlar.
- Məğlub olduqları vaxt voleybolçuları qələbəyə hansı sözlərlə ruhlandırırsınız?
- Mən çalışıram ki, onlar üçün daim istiqamətverici olum. Biz - yəni komanda - hər zaman aydın düşüncəni qorumalıyıq, amma məğlubiyyət insanın daxilində yanmalıdır.
- Voleybolçularınız məğlubiyyətləri necə qəbul edirlər?
- Onlar niyə uduzduğumuzu anlayırlar və məşqlərdə hər gün daha yaxşı olmağa çalışırlar. Bu isə ən vacib məqamdır!
- Azərbaycanda hamı deyir ki, biz italiyalılara çox bənzəyirik — davranışımıza, mentalitetimizə görə. Siz bu fikirlə razısınızmı?
- Açığı, mən belə düşünmürəm. Hamımız fərqliyik: hər bir insan, bütöv bir xalqdan danışmasaq belə, özünəməxsus xüsusiyyətlərə malikdir.
- "Azərreyl"in gələn il üçün planları nələrdir?
- Xüsusi planlarımız yoxdur. Diqqətimizi bu çempionatı yaxşı başa vurmağa və çempionluq titulunu qorumağa yönəltmişik.
- Bakıda sizin üçün ən sevimli istirahət məkanı hansıdır və niyə?
- (Düşünür.) Yəqin ki, hamının burada bulvar adlandırdığı Dənizkənarı Parkdır. Burada gəzməyi, dəniz dalğalarının yüngül səsi altında fikirlərimi qaydaya salmağı çox sevirəm.
Vüqar Vüqarlı
