İdman.biz
Azərbaycan Voleybol Federasiyasının (AVF) İdarə heyətinin geniş iclası keçirilib.
İdman.biz xəbər verir ki, bunu qurumun mətbuat xidməti açıqlayıb.
Tədbirdə AVF-nin prezidenti Şahin Bağırov, vitse-prezident Bəhruz Quliyev, baş katib Faiq Orucov, İdarə heyətinin üzvləri, yüksək liqa komandalarının, Regional Voleybol Klublarının rəhbərləri və federasiyanın digər əməkdaşları iştirak ediblər. Federasiya prezidenti müzakirəyə çıxarılacaq məsələləri diqqətə çatdırıb. Orucov gündəlikdə duran birinci məsələ ilə bağlı ətraflı məlumat verib. Baş katib bildirib ki, bölgələrdə voleybolun inkişafı, aşağı yaş qruplarının yaradılması, gənc qız və oğlanların sağlam həyat tərzinin təmin olunması məqsədilə 8 RVK yaradılıb.
Bu gün yüzlərlə yeniyetmə paytaxtda və bölgələrdə voleybolla məşğul olur. Onların gələcəkdə klublarda çıxış etməsi və milli komandalara cəlb olunmasının vacibliyini vurğulan Orucov bu məqsədlə RVK-lar və Yüksək Liqada çıxış edən klublar arasında müqavilələr imzalanacağını bildirib. Ardınca klub və RVK rəhbərləri bu məsələ ilə bağlı rəsmi sənədləri imzalayıblar.
Beləliklə, "Sumqayıt RVK" (qız), "Şərqi Zəngəzur RVK" (qız) "Abşeron VK"nın, "Bakı RVK" (qız, oğlan), "Oğuz RVK" (qız, oğlan), "Sumqayıt RVK" (oğlan) "AZERRAIL VK"nın, "Naxçıvan VF" (oğlan), "Şərqi Zəngəzur RVK" (oğlan), "Tovuz RVK" (qız, oğlan), "Hacıqabul RVK" (qız, oğlan) Murov Az Terminal VK"nın, "Gəncə RVK" (oğlan) "Neftçi VK"nın, "Naxçıvan VF" (qız) "Milli Aviasiya Akademiyası VK"nın, "Gəncə RVK" (qız) isə "Gəncə VK"nın nəzarətinə verilib.
Tədbirdə bu layihənin həm klub, həm də RVK-lar üçün böyük əhəmiyyət kəsb etdiyi, həmçinin Azərbaycan voleybolu üçün uğurlu olacağı qeyd olunub, klublara və RVK-lara fəaliyyətlərində uğurlar arzu edilib.
İdman.biz
