Sport24.az
Azərbaycan Voleybol Federasiyası (AVF) yerli məşqçilərin inkişafı istiqamətində daha bir layihəyə start verəcək. Sport24.az xəbər verir ki, qurum bu dəfə məşqçilər üçün 1, 2 və 3-cü dərəcəli kurslar təşkil edəcək.
İlk kurs avqustun 9-12-də Qəbələ şəhərində baş tutacaq. Burda Oğuz RVK-nın tərkibinə daxil olan şəhər və rayonların məşqçi-müəllimləri iştirak edəcəklər. Kursda nəzəri və praktik dərslər keçiriləcək. Sonda iştirakçılar imtahan verəcək, sınaqda uğur qazananlara AVF-nin "1-ci dərəcə" sertifikatı təqdim olunacaq. Dərslər FIVB-nin məşqçi-instruktoru, "Azərreyl"in baş məşqçisi Cengiz Akarçeşme tərəfindən keçiriləcək.
Qeyd edək ki, Bakıda və digər bölgələrdə də kursların təşkili nəzərdə tutulub. AVF-nin "1-ci dərəcə" sertifikatı almış məşqçi-müəllimlər yerli çempionatlarda məşqçilik edə biləcəklər. Hər üç dərəcəni alacaq mütəxəssislər isə FIVB-nin Level-1 seminarında iştirak etmək hüququ qazanacaqlar.
