Report.az
Qadın voleybolçulardan ibarət Azərbaycan millisinin əsas məqsədi Qızıl Avropa Liqasında uğurlu çıxış etməkdir.
Bunu "Report"a açıqlamasında yığmanın üzvü Aynur İmanova bildirib.
O, Yunanıstanda təlim-məşq toplanışlarının davam etdiyini bildirib:
"Ötən gün Yunanıstan millisi ilə ilk yoxlama oyunumuzu keçirdik və məğlub olduq (0:4). Çox səhvlərə yol verdik. Qəbulda və müdafiədə istənilən səviyyədə oynamadıq. Qarşıda daha iki oyunumuz var. Əlbəttə, səhvlərimiz üzərində işləyərək daha yaxşı oyun nümayiş etdirməyə və qələbə qazanmağa çalışacağıq".
A.İmanova yoxlama görüşlərinin çox vacib olduğunu söyləyib:
"Çünki bu matçların köməyi ilə zəif tərəflərimizi, səhvlərimizi görürük və bunları aradan qaldırmaq üçün çalışırıq. Bir məqamı da vurğulamaq istəyirəm ki, Yunanıstan millisi tam heyətlə oynayırdı, bizim komandamızda isə əsas oyunçuların əksəriyyəti yoxdur. Bu, bizə müəyyən mənfi təsir göstərsə də, növbəti oyunlarda daha yaxşı nəticə göstərməyə çalışacağıq".
