Report.az
Avropa Qızıl Liqasına hazırlaşan qadın voleybolçulardan ibarət Azərbaycan millisinin Sloveniyada təşkil olunan təlim-məşq toplanışı başa çatıb.
Bu barədə "Report"a Azərbaycan Voleybol Federasiyasının mətbuat xidmətindən məlumat verilib.
Mayın 9-dan Maribor şəhərində baş tutan hazırlıq prosesində komanda Sloveniya seçməsi ilə birgə məşqlər edib. Həmçinin, milli buradakı təlim-məşq toplanışı çərçivəsində ABŞ-ın "Spartans" klubu ilə yoxlama oyunu keçirib və qarşılaşma yığmamızın 4:0 hesablı qələbəsi ilə başa çatıb.
Komanda bu gün Sloveniyadan Yunanıstana yola düşüb. Buradakı təlim-məşq toplanışı mayın 24-dək davam edəcək. Millinin Yunanıstanda da yoxlama oyunları keçirməsi də nəzərdə tutulur.
Qeyd edək ki, yığma Avropa Qızıl Liqasında ilk oyunlarını Bakıda keçirəcək. Mayın 30-da və iyunun 1-də baş tutacaq bu görüşlərdə rəqiblər Macarıstan və Sloveniya komandaları olacaq.
