Report.az
Azərbaycanın qadın voleybolçulardan ibarət millisinin liberosu Yuliya Kərimova komandanın Qızıl Avropa Liqasına hazırlıq prosesi ilə bağlı təəssüratlarını bölüşüb.
"Report" xəbər verir ki, bu barədə Voleybol Federasiyasının mətbuat xidməti məlumat yayıb.
O, açıqlamasında komandada əhval-ruhiyyənin yüksək olduğunu söyləyib:
"Avropa Qızıl Liqasına hazırlıqlara Bakıda başladıq, daha sonra Sloveniyaya yollandıq. Orada Sloveniya milli komandası ilə birgə təlim-məşq toplanışı, həmçinin ABŞ klubuna qarşı yoxlama oyunu keçirdik. Komandamızda əhval-ruhiyyə yüksəkdir. İndi hazırlıqlarımız Yunanıstanda davam edir. Burada bir neçə yoxlama oyunu keçirməyimiz nəzərdə tutulub. Bu oyunlar həm taktiki hazırlığımızın möhkəmlənməsi, həm də komandamızın güclənməsi baxımından mühüm əhəmiyyət daşıyır. Avropa Qızıl Liqasında mübarizəyə mayın 30-da Bakıda start verəcəyik. Komandamızın uğur qazanacağına böyük inamım var. Hədəfimiz bayrağımızı qürurla dalğalandırmaqdır".
Qeyd edək ki, yığma Qızıl Avropa Liqasında ilk oyunlarını Bakıda keçirəcək. Mayın 30-da və iyunun 1-də baş tutacaq bu görüşlərdə rəqiblər Macarıstan və Sloveniya komandaları olacaq.
