Idman.biz
"İstər Macarıstan çempionatında və kubokunda, istərsə də avrokuboklarda yaxşı nailiyyətlər əldə etdik".
Bunu İdman.biz-ə Azərbaycan millisinin voleybolçusu Ayşən Abduləzimova deyib.
O, Macarıstanın "Vaşaş" klubu ilə vidalaşmasına münasibət bildirib. 32 yaşlı blokçu bildirib ki, bu qərarı vermək asan olmayıb: "Vasas"da 6 il çıxış etdikdən sonra ayrılmaq qərarına gəldim. Bu müddətdə komandayla bir çox uğurlar qazandıq. Buradakı çıxışımın və uğurların ən yüksək səviyyəsinə çatdım. Ona görə də məhz indi klubdan ayrılmaq qərarına gəldim. Əlbəttə, bu qərar heç də asan olmadı, amma hər bir idmançının, voleybolçunun karyerasında dəyişikliklər olur və mənim də qərarım bu mövsümə təsadüf etdi".
Abduləzimova karyerasına harada davam edəcəyi barədə qərar vermədiyini deyib: "Gələcək planlarla bağlı hələ konkret bir fikrim, qərarım yoxdur. Çünki əvvəl də qeyd etmişdim ki, mövsüm kifayət qədər gərgin və sıx qrafiklə keçdi. Bu uzun mövsümdən sonra həm müalicə olunmalıyam, həm də bir qədər istirahət edəcəm".
Qeyd edək ki, "Vaşaş"ın kapitanı olan Abduləzimova 5 dəfə Macarıstan çempionu olub.
Aytac Sahəd
İdman.biz
